Recien a wordo publica den prensa un parti di e contenido di un veredicto den un procedemento sumario den Corte di Aruba, fecha 24 di mei 2017. Segun e compania Medwork Caribbean, e publicacionnan y comentarionan den prensa por crea mal comprendemento cerca e empleado y e dunado di trabou.

Ta di lamenta cu expresionnan den prensa ta crea un impresion eroneo cu nos dokternan no ta capacita pa duna un evaluacion profesional riba AO y cu su evaluacion no lo ta valido. E
declaracion di nos dokternan riba AO/AG ta valido. Incluyendo e prome tres dia di malesa, segun e compania.

Bon Dia Aruba kier remarca cu nos a publica riba e caso sinembargo nunca a expresa cu e evaluacion di Medwork no ta valido. Pero nos ta dispuesto pa duna espacio na e comentario di e compania aki, como cu nos tambe a haci esaki cu e compania di abogado riba e caso concerni.

Segun Medwork den un caso sumario, e hues ta evalua solamente e argumentonan cu e partidonan ta trece dilanti sin profundisa su mes den tur e aspectonan huridico. E veredicto tambe ta conta solamente pa cu e caso den particular y mester ta cauteloso pa copy paste un veredicto sumario pa otro casonan cu por bin. Haciendo esaki ta crea expectativanan eroneo.
E compania ta sigui splica: Den e veredicto sumario, hues no a duna un veredicto riba cual tipo di dokter no por duna un evaluacion di malesa y cual dokter si por. Den e caso specifico aki, e hues a wordo confronta entre otro cu dos declaracion di dos dokter y a duna den e caso specifico aki- e beneficio di duda na e empleado. Esaki tambe mirando cu e dokter di SVb a controla e empleado riba e di tres dia cu e empleado a raporta su mes AO, y a declara retroactivo cu e empleado tabata AO for di e prome dia cu e a raporta AO cerca su dunado di trabou. Un declaracion retroactivo ta un masha hopi inusual. Esaki no sa pasa.

Den asuntonan di malesa y despido di empleado no ta inusual cu corte ta trata di proteha e interes di e trahado cu ta wordo considera e partido debil. Esaki ta e beneficio di nos sistema legal, un sistema civilisa, asina Medwork ta comenta.

Palabracionnan haci
Ta na su luga pa recorda y informa tur hende cu den pasado a wordo palabra door di dokternan di cas, SVb y AZV cu e dokter di cas no ta duna un declaracion si e empleado ta incapacita of capacita pa haci trabou. E declaracion aki ta reserva pa e dokter ocupacional (Arbo-arts of Bedrijfsarts). Medwork tin Arbo-artsen y Bedrijfsartsen den servicio, yiunan di tera cu a ricibi nan training extenso pa por eherce e trabou aki.