Diferente medio di comunicacion Venezolano, entre nan e website “Cronicas del Caribe” ta bin anunciando un fast ferry cu lo por cubri e islanan ABC conhuntamente cu Venezuela. Den un articulo cu a sali publica ayera 30 di november riba e website en cuestion ta informa di un inversion Hulandes pa por recupera e waf di Muaco na Falcon y asina na mei di otro aña por activa un ferry pa bay Corsou, Aruba y Boneiro.

E compania Caribbean Fast Ferry e cual tin su sede na Boneiro y a ser funda na mei 2023, segun riba su website ta informa cu proximamente nan ta bay cuminsa nan servicionan di fast ferry entre e islanan Aruba, Corsou, Boneiro (ABC).

Den articulo tambe ta menciona cu empresarionan y Gobierno di Estado Falcon tin proyectonan pa conecta Venezuela cu e islanan ABC unda nan ta spera cu pa mei 2024 por tin e rutanan maritimo activo pa pasaheronan a traves di e compania Caribbean Fast Ferry.

Mediante un renobacion cu e compania ta bay haci nan lo construi un viaducto di e waf internacional de Muaco ubica na La Vela di Coro, Falcon. Ademas ta bay renoba e instalacionnan pa ricibi e turistanan y henter e proceso migratorio pa asina cuminsa cu nan servicio na mei di otro aña, manera e informacion ta indica.

Dia 10 di november ultimo a tuma luga e Virtual Business Matchmaking entre comercio di Aruba y Venezuela na unda minister di Asuntonan Economico, Geoffrey Wever a sigura cu tabata un exito di por a mira hopi interes di ambos banda pa reactiva lasonan comercial.

Den un declaracion, minister Wever a sigura cu esaki tabata un “Match” unda nan ta bin enfocando principalmente riba siguridad di cuminda, stabilisa costo di bida, y promove (diverso) actividad economico. Tocante productonan di construccion y alimentacion el a indica cu ta “pa por baha e prijs di construccion di cas y tin mas materialnan mas economico, pa productonan di alimentacion tambe debi cu hopi famia tin retonan grandi y si nos por ofrece paketenan di productonan diverso y cumpliendo cu calidad, mi ta kere nos por ofrece productonan di prijsnan mas competitivo y asina trece un alivio pa e carteranan di e ciudadanonan.”

Den e Matchmaking, e companianan por comparti idea cu otro pa wak si tin beneficio mutuo den e relacion entre comercio di Venezuela y comercio di Aruba. Den esaki a enfoca riba nuebe (9) sector, esta: Turismo, Pesca, Construccion, Inmobiliario, Petrolero, Turismo di Salud, Tecnologia, Agroindustria y Salud/Bienestar. Por raporta cu ya caba a demostra di tin interes grandi di parti di comercio pa haci negoshi cu otro, manera un di e comunicadonan di e ministerio ta afirma.

Sinembargo, te ainda no ta confirma si den e proyectonan aki lo tin un fast ferry entre Aruba y Venezuela y pa e motibo ey, redactor di Bon Dia Aruba a tuma contacto cu minister Wever tocante e publicacion aki pa puntra minister su reaccion riba esaki. Na Venezuela, specificamente na Falcon a cuminsa promove e fast ferry entre e islanan ABC, pa locual e sector comercial ta hopi contento cu esey, pero Aruba mes no a confirma si esaki ta berdad of no.

Te ciere di edicion aki, redactor di Bon Dia Aruba no a haya un contesta di e minister.

Den pasado, tabatin un proyecto y hasta a firma un MoU den cual minister anterior di Transporte Chris Romero a presenta conhuntamente cu Corsou cu lo a por a cubri e rutanan di Aruba, Corsou y Boneiro unda ministernan concerni a haya diferente retonan y e proyecto a stop.