Algun dia pasa Bon Dia Aruba a publica riba un noticia falso cu ta circulando riba un supuesto paro riba e rehabilitacion di refeneria di Aruba. E publicacion aki a wordo haci door di e website di Oil & Gas Journal kende riba 14 di juli a duna di conoce cu lo tin entre otro un investigacion andando door di autoridadnan Mericano y Hulandes riba diferente persona, incluiendo algun minister di Aruba. Por lesa nos publicacion anterior AKI.
E ultimo dos dianan por tuma nota cu diferente medio di comunicacion, tanto local como tambe di Corsou lo a uza e mesun fuente di noticia, dunando impresion cu esaki ta veridico. Manera cu Bon Dia ya caba a duna di conoce, e noticia aki ta falso ya cu e no a wordo publica ningun otro caminda ni tampoco e nomber di e presunto editor cu lo a scirbi e noticia, no ta conoci den e database di Associated Press (AP).
Bon Dia Aruba lo ta tumando contacto cu redaccion di Oil & Gas Journal ya cu segun un declaracion di Minister de Meza, e medio di comunicacion aki lo a tuma distancia di e declaracion. Notabel ta cu e noticia ya no tey mas riba e website menciona, ni tampoco ta ser haya riba niun otro medio oficial.
