Por lo menos 50 persona a muri na Minas Gerais pa motibo di e awaseronan fuerte cu desde diahuebs ultimo ta asota e di dos estado mas pobla di Brazil, un situacion cu ademas a laga mas di 32.000 persona afecta, di cual mas di 4.000 a keda sin cas.
Di acuerdo cu e boletin ultimo di Defensa Civil publica ayera diamars, 65 persona a keda herida pa via di e yobidanan y ta continua e buskeda di otro dos persona cu ta desapareci.
Te dialuna mainta e cantidad di morto tabata di 45 y di personanan desapareci tabata di 18, pero e cantidad di fayecido a aumenta den oranan ultimo y algun persona a haya su famianan perdi, segun e teniente coronel Flavio Godinho, portavos di Defensa Civil a splica.
E tormentanan den e region a causa hopi daño y por lo menos 28.043 persona a bandona nan cas temporalmente pa via di e inundacionnan.
Otro 4.101 persona no por regresa na cas pa via di e yobidanan, segun e reporte di entidad a bisa.
E ciudad cu tin mas morto ta Belo Horizonte, e capital regional, unda a registra 13 di e 50 victima fatal.
E situacion provoca pa e yobidanan a obliga e Gobierno regional di Minas Gerais pa declara situacion di emergencia na 101 districto afecta pa e awaseronan, en tanto cu tres ciudad (Catas Altas, Ibirite y Orizania) a declara den estado di calamidad publico.
E reconocemento di situacion di emergencia of calamidad publico ta permiti pa Gobiernonan regional duna prioridad y atencion pa e districtonan mas afecta y contrata servicio of haci cumpra di materialnan di urgencia sin ningun tipo di retraso.
