Tur palabra grandi y bunita pa describi e bon intencionnan di e gobierno actual pa loke ta medio ambiente y sostenibilidad di desaroyo socio economico, nos a tende un y mil bes caba.

Un cos ta sigur: nan a logra convence nos cu nan ta e gobierno mas ‘berde’ cu Aruba a yega di conoce. Depende na ki tipo di berde bo ta referi, naturalmente. E caso actual di e dump di asbest na Lago Heights ta e ultimo muestra di kico ta pasa ora un gobierno ta papia un cos, y ta haci otro.

Den e caso particular aki, nos por mira e resultado tambe di kico ta pasa ora un gobierno ta e partido debil den negociacion. E operador nobo naturalmente a laba man caba, argumentando cu esaki ta un asunto entre gobierno (o e compania Refineria di Aruba) y e propietario anterior, Valero. Den e negociacionnan tocante e traspaso di e propiedad tabata obvio cu ta Valero tabata mantene e cartanan mas fuerte y e acuerdo tabata cu Refineria di Aruba, e actual propietario legal, a keda cu e herencia di material peligroso aki. Y como cu den e caso aki, tras di e compania propiedad tin gobierno como representante di e accionista unico, Pais Aruba, ta simplemente haci sin puntra, sin pensa. Y ora e kehonan cuminsa drenta, ningun instancia gubernamental ta duna cara, pasobra nan tin e orden pa no haci nada, no atende, no contesta… Laga ciudadano dal nan cabes den un muraya di silencio, te ora nan fada y laga e asunto manera cu e ta. Sigui biba y djis lubida cu tin un monton di material dañino pa salud dera na menos di cincuenta meter di bo cas…

Ta di aprecia cu e bisiñanan no a baha cabes y a dicidi di bay Corte Comun cu nan keho, pa trata di haya un decision di e huesnan pa ordena Ministerio Publico tuma accion contra esunnan cu ta viola ley. Pero ta spera nan den futuro, hasta si nan gana e bataya aki, mas contratiempo como bisiña. No ta pornada cu Conseho Consultativo a critica e situacion cu gobierno a crea pa e refineria, unda nan ta garantisa e ‘stabilidad di e cuadro huridico’ pa Citgo. Esey ta implica cu legislacion nobo, cu tin consecuencia financiero pa Citgo, por conduci na compensacion di banda di gobierno di Aruba.

Ademas a percura pa Citgo, contrario na Valero, ya no ta cay bao di e obligacion di tin un permiso bao di Hinderverordening y por lo tanto no tin regla di derecho publico vigente pa loke ta asunto ambiental y di molester. RvA ta bisa cu: “Aparentemente a perde for di bista cu a base di e cambio proponi den articulo 14, cu cual e refinerianan y luganan di almacenahe di combustibel inflamatorio  (i.c. CAR – esta Citgo Aruba Refinery) ta keda exclui di e obligacion di permiso, e base legal di e permiso existente di molester (hindervergunning) di Valero ta caduca. Esaki tin como consecuencia cu te na e momento cu e landsbesluit HAM bao di articulo 13, paraaf A, cu regla separa pa refineria y luganan di almacenahe di combustibel inflamatorio a keda estableci, CAR durante e periodo aki no tin obligacion di tin un permiso a base di Hinderverordening y cu pa CAR tampoco di otro manera ta existi  algun norma di derecho publico pa cu proteccion ambiental y molester den e periodo ey. Cu esaki ta crea un ‘vacuum’ di derecho publico tanto riba tereno di stipulacion di norma como riba tereno di supervision y mantenemento di prescripcion ambiental y di molester. Solamente via derecho priva (contractuele wanprestatie) por mantene e ‘good industry practices for the international oil industry’ riba tereno di medio ambiente, salubridad y siguridad durante e periodo menciona.”

Awor, conociendo Aruba su practica super slow y dehado di anda cu asunto legal, porta ta hancho habri pa e refineria bay opera sin cu sikiera tin e permiso bao di Hinderverordening cu tabata vigente pa Valero. Y si acaso bin legislacion ambiental den futuro, e ta bay costa nos placa… Pregunta: ta ken a traha e cos aki? Nos ta kere cu Conseho Consultativo a formula e cos aki masha suave, bisando cu aparentemente e asunto aki a scapa di nan atencion. Si nos no mira legislacion ambiental drechi, ni en general ni pa e refineria den e añanan cu ta bin, anto e conclusion lo ta na su luga cu e cos aki no ta ningun casualidad, sino mas bien ta haci esaki conscientemente di e manera aki.

Loke nos ta mira nos dilanti ta cu di tur manera ta purba desvia asunto di tal manera, cu esun cu ta bin inverti na Aruba no tin cu maha cu legislacion ambiental. Esey no ta conta pa e refineria so, sino tambe pa otro empresa, cu por haci uzo libremente di e posibilidadnan di tira sushi na cualkier di e dump ilegalnan cu tin, y ‘no questions asked’. Forsa na e bisiñanan na Lago Heights den nan lucha, pero na nivel di gobernacion no ta mira nada cambia.