Pa temor cu ex-pareha y man drechi di e fayecido Jeffrey Epstein, Ghislaine Maxwell lo comete suicidio despues di su aresto siman pasa na New Hampshire, pa varios cargo entre nan trafico di menor, autoridadnan federal di New York a duna orden pa kita su paña y clechi den su cel, y e mester a bisti paña di papel.
Maxwell, di 58 aña di edad, ta deteni den Centro di Detencion Metropolitano na Brooklyn, unda 1,600 persona ta deteni. Ta e mesun prison unda Epstein a comete suicidio dia 10 di augustus 2019.
Departamento di Husticia a implementa protocol di siguridad adicional y funcionarionan federal specificamente a busca di garantisa proteccion adecua pa Maxwell. E tipo di medida aki a ser adopta pa preveni cu otro recluso of su mes por caus’e daño.
Otro protocolnan ta inclui sigura pa e tin un compañera di cel, pa monitor y sigura cu semper tin un persona cune mientras e ta cera.
Siman pasa a detene Maxwell na un mansion na New Hampshire y a acus’e di yuda Epstein den un trama di abuso sexual di menornan di edad despues cu su paradero tabata desconoci pa un aña.
Maxwell a contrata pa su defensa Christian Everdell, un ex- fiscal adhunto ken a ricibi premio pa su trabou den investigacion y captura di narcotraficante Mexicano, Joaquin ‘El Chapo’ Guzman.
Un carta dirigi na hues federal Alison Nathan, defensa di Maxwell ta bisa cu el a accede na presenta su mes di forma ‘remoto’ for di e centro di detencion den e comparencia di formulacion di cargo y cu ‘tur partido’ ta disponibel mainta di 14 di juli.
