Minister presidente, Evelyn Wever-Croes (MEP) a anuncia cu pa via cu no tin niun caso positivo, esaki a trece cune e decision pa flexibilisa e medidanan pa e dianan nos dilanti. Entre otro mas establecimento, construccion, y gobierno lo habri otro siman pero cu e expectativa cu tur hende lo mantene nan mes na e normanan di distanciamento fisico/social y di samenscholing.

Un di e medidanan cu ta flexibilisa di nan tin di haber cu e orario di toque de queda (TDQ), cual entrante 28 di april ta cuminsa for di 10 or di anochi y ta caba 5 or di mainta. Negoshi por keda habri te 9 pm maximo. E demas regla di shelter in place y TDQ ta keda vigente.

Tur e medidanan flexibilisa lo ta vigente pa un periodo di 14 dia, pa asina evalua con cada paso ta bay. Asina por ehempel, na medida cu keda monitor e cantidad di caso, lo por laga mas persona ta presente na trabou alabes y mas personal di gobierno pa t’ey fisicamente na trabou. For di 4 di mei lo flexibilisa e shelter in place, pero manteniendo e reglanan di higiena y distanciamento social. Asina lo mester sigui brinda publico hand sanitizer, hende lo mester sigui laba man frecuentemente, lo mester haci establecimentonan limpi regularmente dependiendo cuanto hende bishita, etc.

Tienda, museo, gobierno lo habri cu restriccion 4 di mei.
Den e prome fase cu nos lo drenta awo no lo por tin mas cu 15 persona na un negoshi, incluyendo e personal di e compania. E di dos nivel lo permiti 50 persona y despues di 125 persona y e lo sigui subi te ora nos actividad economico por ta activo bek. Tur departamento di gobierno lo por ta habri otro siman cu capacidad di un 25% di su personal pa servicio esencial so. Despues e lo por bay pa 50%, y asina lo sigui. E mandatario a bisa cu den e prome fase museonan, centro di arte, tienda di paña, joyeria, truck di cuminda, tienda of servicio cu no tabata riba lista no esencial y construccion lo por habri. Scol ta keda cera por lo pronto despues di 11 di mei. Tur aspecto recreativo, manera gym, shopping mall, mercado, bar, nightclub, restaurant (take-away si por), salon di beyesa, barbero, massage y sauna tambe lo mester keda cera.

Construccion chikito y mediano por habri pero mester pidi permiso.
E sector di construccion lo cuminsa tambe pero e no por cuminsa sin mas. Nan mester di permiso special prome, cual lo ta obtenibel na DOW, entrante 4 di mei. E flexibilidad aki lo cuminsa otro siman cu proyecto chikito y mediano di construccion cu maximo 15 persona. Esaki ta conta pa compania cu kier reanuda trabou pero tambe persona priva cu kier construi un cas. Diaranson 6 di mei e sector di construccion por cuminsa pero prome mester regla nan permiso, y esaki ta cay riba maneho di minister di husticia y minister di infrastructura. A considera construccion pasobra esaki lo aporta na desaroyo economico y pa entrada di famianan na Aruba.

Tur aspecto di flexibilisacion lo conta cu control estricto, segun prome minister. Esaki kiermen si un proyecto di construccion cu permiso, un tienda di paña, un supermercado, of cualkier establecimento no percura cu tin distancia fisico di 1.5 meter minimo entre persona den establecimento, lo controla nan y cera nan.

Koolman: ‘Comunidad ta cla pa e siguiente nivel?’
Sharline Koolman di DVG reaccionando riba informacion di polis cu a indica cu ultimo weekend tabatin basta hende riba beach aglomera, a puntra su mes si comunidad ta cla pa e siguiente nivel na caminda pa e COVID-19 exit. Claramente, e medidanan aki no lo por sigui pa semper, pero e ta puntra si comunidad ta cla pa e normal nobo di distanciamento fisico, y medidanan di higiena. “Comunidad no por bay den panico culpa otro, dunadonan di cuido of gobierno, si casonan presenta. Tur esaki ta depende di comunidad su comportacion mes”, Koolman a expresa. El a haya informacion di e instituto di salud publico Hulandes RIVM unda den nan opinion parce cu Aruba a logra contene e virus te awo. Sinembargo, tin un grupo chikito di ciudadano cu no ta siguiendo e medidanan. “E par di hendenan aki por causa e daño na e gruponan cu nos ta purba proteha”, Koolman a expresa.