Ayera nochi, durante un conferencia di prensa transmiti en bibo riba Facebook y sin miembronan di prensa presente, Gobierno a confirma cu tin un di tres caso positivo di coronavirus na Aruba. Ademas a anuncia cu tur establecimento cu no ta di prome necesidad lo tin cu cera pa 10pm.
Contestando pregunta di tanto prensa como oyentenan, a indica cu en berdad un di tres persona a test positivo pa COVID-19 na Aruba. Sinembargo, conforme regla y ley no por a revela mucho informacion di e pashent en cuestion. Lo unico cu a indica ta cu ta trata di un caso ‘import’, esta un persona cu a bin cu e virus di afo, y no un persona cu a ser contagia na Aruba mes.
E motibo principal di e conferencia di prensa tabata pa informa tocante e maneho nobo, den cual tur establecimento cu no ta di prome necesidad lo tin un ‘toque de queda’ di 10or di anochi. Prome minister Evelyn Wever-Croes a splica cu motibo cu no tabatin ningun persona presente na e conferencia di prensa tabata pa practica ‘distanciamento social’, pues pa evita cu hende ta cerca di otro, duna man, y asina tin mas chens di transmiti coronavirus.
Wever-Croes a destaca cu ta keda na comunidad pa atende cu e yamado pa keda cas y practica ‘distanciament social’. El a bisa cu tur establecimento, sea restaurant, bar, supermercado, pompstation, tienda, tur lo tin orario pa cera 10pm, sin importa ki sorto di permiso nan tin. Unicamente establecimentonan di prome necesidad, manera hospital, polis, etc lo keda opera despues di e orario stipula. E medida aki ta bin acerca pa asina sigura cu e transmision di coronavirus no lo bay for di man. Den esaki, Wever-Croes a indica tambe cu no lo ta permiti pa tene fiesta priva.
Pa finalisa, a reitera e suplica pa hende keda cas, practica distanciamento social y cumpli cu tur orden di autoridadnan, pa hunto nos traha pa sigura salud di tur ciudadano.
