Ayera mainta Gobierno di Aruba hunto cu algun miembronan di Crisis Team a anuncia e cambio di algun medidanan pa e proximo dos siman mirando e aumento di casonan positivo di Covid-19 den dianan aki.

Alto Comisario di Cuerpo di Polis di Aruba Vanessa Tjon Kock a splica cu pa motibo di e situacion cu e pais tin na e momentonan aki Crisis Team diahuebs ultimo a tuma e decision pa cu cierto medidanan, el a informa cu e medida di toque de queda for di awe ta cuminsa 10or di anochi te cu 5or di mainta.

Esaki ta nifica cu lo tin un cambio den oranan di ciere di establecimentonan cu mester cera pa 9or di anochi, asina mes el a indica cu e aña aki pa loke ta trata temporada di Semana Santa e tradicion di campamento no lo keda permiti.

Gebiedsverbod ta cuminsa 7or di anochi caminda cu Polis lo haci su control na varios caminda y no solamente den parkeerplaats y tambe lo mantene e samenscholingsverbod cu a bira maximo dos persona y lo sigui vigente.

Aunke e pais ta bibando un situacion hopi dificil pa loke ta trata Covid-19, te ainda Cuerpo di Polis ta ricibi e solicitud di permisonan pa loke ta trata Drive by of Drive Thru, cu segun Kock a sigura ni un di nan ta keda permiti den dianan venidero.

Tambe el a declara cu consumo di alcohol riba camindanan publico ta bay ta prohibi y cu tambe ta conta pa areanan di beachnan of parkeerplaats.

“Esaki ta prescribi tambe den decreto ministerial caminda na e forma con esaki ta bay keda ehecuta”, Kock a declara.

Semana Santa ta un temporada cu hopi hende ta bay no solamente na e parti di e beachnan sino tambe riba caya, aworaki “nos ta den un situacion hopi alarmante” y cu no mester compara un wave cu otro, hopi medida a keda tuma pa e situacion actual y pa loke ta trata e trabou di cuerpo policial esey no ta cambia, esey ta bira mas hopi.

Siguientemente, Sharline Koolman di Departamento di Salud Publico (DVG) a anuncia cu scolnan lo keda cera 3 dia prome cu vakantie cuminsando for di dialuna 29 di maart, cu excepcion pa alumnonan cu ta den examen, CP of toetsweek. E alumnonan aki por bay scol pa traha SE, CP of toets. El a sigura cu crèchenan si por keda habri.

Tabatin casonan di cluster na varios scol na districto di San Nicolas, Playa y Noord, el a menciona cu e variantenan ta haci un cambio, e variante Britanico ta mas contagioso loke ta nifica cu mas poblacion ta keda infecta y muchanan tambe, mesun cos cu otro personanan ta hay’e e poblacion di mucha contagia tambe lo bira mas.

Cu loke tin haber cu gym, of localidadnan di haci ehercicio a tuma decision di cera e establecimentonan aki pa e siguiente dos siman.

Nan a ripara cu desde dos luna pasa, e personanan cu ta frecuenta mas un gym ta keda infecta y e ta mustra como cluster, ta existi 10 gym den particular cu ta keda menciona mas cu cinco biaha durante e ultimo dos luna caminda cu nan tabata posibel luganan di contagio.

Banda di esaki, tin supermercadonan y tiendanan di hardware na unda e doñonan mester limita su clientenan na 50% door di usa 50% menos garoshi of macutu.

Ademas di esaki, restaurantnan por duna servicio na un maximo di 4 persona na mesa paden y pafo, no ta importa si ta famia of amistad y mucha bou 12 aña no ta keda conta den e 4 na mesa.

Di esaki, Koolman a afirma cu e medida aki na restaurant y bar restaurant ta pa motibo di no haya aglomeracion pa via cu nan ta esunnan cu mas ta wordo menciona ora nan ta haci e preguntanan di investigacion di na unda e persona por a keda contagia.

E medida di bishita na cas segun Koolman a bisa, esey si ta permiti pero pa esunnan cu ta hende grandi y mester di atencion di un otro persona, esaki a trece controversia pa loke ta trata mesanan di restaurant cu cuatro hende ta permiti pero bishita na cas no, pa loke Koolman a señala cu e personanan ta responsabel pa nan mes y pa nan famia.

“Kico bo kier, si bo kier bay sinta den un mesa cu un hende cu bo tin cuatro of cinco luna sin wak of warda pa wak si e casonan ta baha de aki dos siman”, el a afirma.

Asina mes, a keda treci dilanti un pregunta cu tin di haber cu e impacto economico cu esaki lo por sigui causa na Aruba na unda cu minister di Salubridad, Turismo y Deporte Dangui Oduber a expresa cu tur decision ta un decision dificil pa tuma pa motibo cu nan sa cu esey ta afecta economia, comerciantenan, deportistanan of salud mental di e ciudadano, “ni un decision ta facil pa tuma” el a sigura.

El a afirma cu nan ta purba balansa e decisionnan aki, tin hopi pensamento riba cada proposicion y hopi discusion ta bay riba kico por ta e efecto y consecuencianan, el a pone como porehempel, cu awor cu ta den un pik di contagio y di turismo tambe, cu ora nan a dicidi di hala e orario di ciere y orario di toque de queda esey tin un impacto directo riba comerciantenan, el a expresa cu nan ta consciente di esey pero cu e situacion na e momentonan aki nan no por haci otro y cu si nan no lo haci’e hospital por bira completamente yen.

Algun dianan pasa a keda informa cu na luna di juni barco of crucero por cuminsa bishita Aruba, pa cu esaki minister Oduber a splica cu e protocol cu lo keda usa ta cu tur tripulante y pasahero cu ta bin den e crucero mester ta vacuna y 72ora prome cu e barco yega Aruba, tur persona abordo mester por a haci un prueba PCR.

Bon Dia Aruba a puntra pa minister Oduber cu mirando cu mester mas o menos 85% di e populacion di Aruba cu ta mas di 102.000 hende cu tin cu vacuna pa crea inmunidad den comunidad, kico lo por pasa si nan no ta yega na e porcentahe aki? lo keda cu tur e medida cu tin awor aki te ora lo logra 85%?

Minister Oduber a contesta cu e cantidad di personanan cu tin registra pa vacuna aworaki ta casi 98.000 hende mayor di 18 aña, e obhetivo ta pa yega entre 70 pa 85% y nan ta consciente cu esey no ta asina facil, pero mientras tanto nan tin cu mantene e medidanan, pero no por anticipa kico lo bay pasa aki algun luna.

Importante ta pa aworaki por proteha e grupo di riesgo, e grupo cu normalmente por wordo hospitalisa, segun estadisticonan caba cu nan tin nan sa cu gran mayoria di esunnan cu ta hospitalisa ta personanan riba 60 aña of esunnan cu entre 18 pa 60 tin un condicion fisico, “p’esey nos enfoke ta muy specialmente riba e dos grupo aki pasobra si nos logra vacuna e 75% di e dos grupo aki ya nos por tin un trankilidad pasobra no ta bay sinti e presion na hospital pa asina por flexibilisa e medidanan y cu esey tambe ta depende di e cantidad di vacuna cu por haya ya cu te e momentonan aki e cantidad ta hopi limita”.

Ademas, siman pasa a keda treci dilanti cu 5 persona a haya Covid-19 dos biaha, pa cu esaki Bon Dia Aruba tambe a puntra si den caso cu e vacuna su inmunidad ta wanta solamente un aña, esey lo nifica cu mester vacuna tur aña?

Koolman a sigura cu probablemente si pa motibo cu e ta bira mesun cos cu influenza, e vacuna cu tin contra griep cu ta aplica tur aña.