Medidanan implementa for di ayera lo ta vigente pa dos siman

Gobierno di Aruba a ofrece un conferencia di prensa pa asina informa comunidad tocante e situacion cu Aruba ta bibando na e momentonan aki. Prome minister Evelyn Wever-Croes a splica cu nan ta calcula cu e casonan activo pa Covid-19 por yega na 2.000 den proximo dianan aki ora lo cuminsa aña 2022.

“Nos ta den e di cinco ola na unda nos ta surpasando e otro olanan, sinembargo, si bo ta mira con e ola cinco aki ta weitando por mira cu Omicron ta tumando luga na Aruba y nos ta preocupa; pero esey no ta motibo pa panico”, el a sigura.

Ademas, el a trece dilanti cu malesa causa pa Omicron ta uno menos severo y esey ta nifica menos hospitalisacion. Tambe e ta keda ‘aparentemente’ menos dia activo, na unda cu variante Delta tabata esun cu a haci mas daño na Aruba cu hopi mas hospitalisacion. Si e tendencia aki ta sigui e mesun caminda aki, den un dia por registra e tripel e cantidad di caso cu a registra cu variante Delta, loke por pone cu capacidad den hospital lo por yena hopi lihe.

“E problema no ta solamente cama, e problema ta personal. Generalmente na Aruba na e momentonan aki caba varios doño di trabao ta experenciando cu hopi trahado ta sali positivo y mester bay den isolacion of cuarentena, loke ta paralisando operacionnan”, prome minister a bisa.

Pa evita di yega na e punto ey el a enfatisa cu nan no ta bay implementa medidanan extremo como un toque de queda of un lockdown, pero si lo tuma cierto pasonan pa disminui e riesgo. E cambionan cu lo drenta na vigor for di mañan 30 di december ta cuminsa na HORECA cu lo tin un orario di ciere di 12or di anochi pa establecimentonan y 1or di marduga pa Casinonan, restaurantnan mester tin maximo 6 persona na mesa, rumshop cu maximo 4 persona na mesa, entretenimento cu un performance di maximo 5 persona.

Encuentronan social of familiar cu maximo 60 persona paden y 75 persona pafo.

Pa loke ta trata tiramento di pagara comerciantenan por tira pagara te 12or di merdia di 31 di december, despues di e ora ey no ta permiti.

Pa tiendanan, 1 persona so pa famia por haci compra utilisando garoshi of macuto, deporte lo por continua pero sin publico y entiero por maximalisa na 75 persona solamente.

Aparte di e medidanan aki, prome minister a expresa cu tin cierto recomendacionnan na unda nan ta limita bishita di famia durante dianan di fiesta, usa tapaboca na tur momento, limita biahenan pa paisnan di riesgo halto of hopi halto.