“Mayaro” ta e nomber di otro virus transmiti pa e mesun sangura Aedes Aegypti cu ta e mesun sangura cu ta transmiti Dengue, Chikungunya y Zika, malesanan cu nos a yega di conoce na Aruba tambe.
Aunke e alarma no a wordo bati caba den nos region, Organisacion Mundial di Salud (WHO) no ta descarta cu e virus aki lo yega den nos region. E ta produci un malesa similar na dengue y chikungunya.
E sintomanan di “Mayaro” ta entre otro keintura halto, dolor di joint, dolor di cabes, dolor na bo wowonan y draaimento di cabes. E molester aki lo por dura entre 3 pa 5 dia.
Aunke Organisacion Panamericano di Salud (PAHO) a descarta un supuesto alerta di e virus “Mayaro” den nos continente Americano; mientras cu WHO a emiti un alerta caminda nan a pidi na e poblacion Latino Americano pa bin cu medidanan di prevencion pa evita e presencia di e malesa aki den nan teritorio.
Segun Organisacion Panamericano di Salud (OPS), e virus aki a aparece mas cu 60 aña pasa den e comunidadnan cu ta biba leu di e ciudadnan na Venezuela, Peru, Brasil y Bolivia, pero e prome biaha cu el a wordo identifica tabata entre trahadonan na un parti rural cerca di e riu Mayaro na Trinidad. Den medionan internacional a wordo divulga cu Organisacion Mundial di Salud a laga sa cu recientemente a wordo raporta un caso na Haiti.
