E mediconan specialista di Hospital dr. Horacio E. Oduber ta desea di expresa nan preocupacion pa e desaroyonan actual di e pandemia di COVID-19 na Aruba.
E cantidad di contagio desde e di dos ola na inicio di augustus no ta baha. E cantidad di persona interna den hospital ta sigui aumenta constantemente. E cantidad di pacient den estado grave y di fayecido tambe ta aumenta.
E presion riba capacidad di hospital y di personal tambe ta sigui aumenta.
Den ultimo simannan a tuma diferente medida di escalamiento den hospital pa por sigura e cuido tanto pa pacient di COVID-19 como pa e pacientnan cu no tin COVID-19.
Asina a limita e cuido electivo te na cuido esencial y urgente, esaki ta encera concretamente cu operacion y examen cu no ta urgente y cu medicamente por warda ainda, actualmente ta ser posponi.
Den hospital a desocupa cierto departamentonan pa duna espacio na cuido di pacient di COVID-19, esaki ta bay a costo di nos otro cuido. Enfermero, medico y personal di apoyo ta ser asigna na cuido fuera di e shiftnan regular.
Den ultimo lunanan diferente experto a traha intensivamente pa mehora y aumenta protocol, guidelines, material y recurso humano pa por regula e cuido di pacient di COVID-19 mas tanto posible. E meta ta pa laga e cuido regular continua mas largo cu ta posible.
A traha intensivamente cu otro dunadornan di cuido na Aruba, manera asociacion di dokter di cas, pa hunto por enfrenta e epidemia lo mihor posible.
Cu cada escalamiento di e asina yama cuido di COVID-19 esaki lo bay a costo di pacient cu mester di cuido pa otro motibo. Capacidad maximo di cama, regular, pa pacient di COVID-19 y pa pacient di IC ta depende di factor manera entre otro personal disponible, medicacion y material. Manera cu riba henter e isla habitante ta keda contagia cu Covid-19, asina tambe e ta toca personal na hospital. Esaki tin consecuencia directo pa nos disponibilidad di personal.
E capacidad maximo aki di cuido ta dinamico y nos tin miedo cu, a pesar di e medidanan di precaucion, si e cantidad di contagio no ta baha y a consecuencia di esey e cantidad di hende gravemente malo di Covid-19 keda aumenta, dentro di poco hospital no por duna cuido sigur na tur pacient.
Hospital dr. Horacio E. Oduber ta e unico hospital na e isla cu ta duna cuido na pacient di COVID-19, e unico cu un departamento di intensive care. E situacion aki por lo tanto ta toca tur hende.
Na modo di papia anto ta 5 pa 12 y nos ta desea di haci un yamado urgente na e poblacion pa tuma e situacion aki hopi na serio. Nos ta desea di haci un yamado na e poblacion pa sigui e medidanan imponi caba manera higiena di man, mantene distancia y tapaboca, y pa cumpli cu e medidanan di isolacion y cuarentena. Tambe nos ta desea di pidi e poblacion pa den e tempo nos dilanti no bay bishita famia y amigo, no bay fiesta o reunion, pero simplemente keda cas mas tanto posible! Por combati e epidemia aki solamente si tur hende coopera y haci di su parti loke mester.
