(AP) – Den e simannan despues cu un medicina nobo pa Alzheimer’s a ser aproba, pashentnan cu speransa nobo a bombardia Dr. Alireza Atri cu yamadanan y e-mail tocante un tratamento cu e lanta hopi duda pero tambe hopi emocion.
E pashentnan kier sa si e medicina nobo aki por ta un opcion pa nan. Manera hopi dokter di cas, Atri no tin contestanan facil. “E no ta un contesta di si of no simpel” e neurologo di Banner Sun Health Research Institute den Arizona a declara.
I probablemente no lo ta pa hopi tempo. Dokternan alrededor di e pais te ainda ta purbando di saca afo ken lo ta adecua pa ricibi e medicina nobo aki, yama Aduhelm, cua den su miho uso, ta detene e enfermedad fatal na un manera sumamente efectivo y pa hopi tempo. Otro medicinanan pa e enfermedad di Alzheimer’s ta calma e sintomanan manera perdida di memoria, insomnio y depresion, pero esaki ta temporalmente so.
Mientras cu algun clinica ya caba a cuminsa otorga e medicina aki, hopi proveedornan ta bisa e lo tarda simannan y probablemente te hasta lunanan largo prome cu nan ta cla. Seguronan di salud, incluyendo e proveedor monetariamente mas grandi di e produccion di e medicina aki, Medicare, te ainda tin cu determina cual pashentnan lo ricibi e tratamento aki cubri, cual lo por costa mas cu 50,000 dollar pa aña. Tambe dokternan ta preocupa cu e emocion lo afecta e decisionnan cu pashentnan y familiarnan den buskeda di e medicina aki.
“Hendenan ta desespera pa motibo cu e enfermedad aki ta uno sumamente horibel” a ser declara pa Dr. Michael Greicius di Stanford University.
Karl Newkirk ta spera di por cuminsa ricibi Aduhelm si su dokter otorga e medicina aki na su persona, pa motibo cu e no ta mira ningun otro medicina cu ta bal la pena purba.
“E ta mustra manera e unico strea den shelo” e pashent di 80 aña den Sarasora Florida a bisa, ken ta den e etapanan di comienso di Alzheimer’s.
Newkirk su dokter a confirma cu e ta un bon candidato pa e medicina aki. Aunke e consultante di tecnologia te suficientemente bon pa por sali cu su nietonan bay parkenan di atraccion, e problema ta sinta den memoria di corto tempo. Newkirk kier purba aduhelm, aunke e ta consciente di e medicina su limitacionnan.
Michelle Hall, di 54 aña di edad, biba na Bradenton, Florida tambe ta emociona pa por papia tocante e medicina nobo cu un specialista di Alzheimer’s.
Aduhelm, traha pa Biogen ta e prome medicamento pa Alzheimer’s nobo den casi 20 aña. El a ser aproba pa Food and Drug Administration den comienso di e luna aki, y a causa un poco di critica di expertonan, incluyendo conseheronan di e agencia aki ken a adverti cu e supuesto beneficionan di e medicina ta basa riba datonan no hopi firme. 3 persona a retira pa causa di e decision cu FDA a tuma.
