Ya tin mas di shete luna a pasa y ainda e capitulo di Aura Casino no a cera. Mediador di Gobierno, Anselmo Pontilius a splica cu te asina leu, den tur e temponan aki ta solamente dos compania a tuma esaki na serio y a sinta na mesa pa asina purba di yega na un acuerdo. E prome compania no a logra, pero finalmente, e
hotel a haya un otro grupo cu a informa cu nan ta interesa y cu lo tin respaldo di companianan di Canada, cu tin conocemento den operacion di casino y a bay mesa cu hotel.
Durante e periodo aki, e trahadonan a keda biba den angustia di no tin un trabao. Gran mayoria di e trahadonan tin e speransa cu por haya un reapertura di e casino. E ultimo dos simannan, e abogado di FTA y e abogado di e grupo aki ta combersando, pasobra nan a informa cu practicamente nan tin un acuerdo caba cu un hotel pa nan opera e sala di e casino aki. Tin dos punto, segun mediador. Nan a informa cu nan lo por tuma un grupo limita di 25 trahado pa motibo di e espacio chikito di e casino y nan ta den discusion tambe riba e pago di e lunanan cu e trahadonan no a cobra.
Ya caba FTA a manda un carta pa minister di husticia pa hala e permiso di operacion di casino aden. Si por bay bek den pasado, Gobierno a informa cu nan lo bisa cu nan lo no tin otro alternativa. Di parti di mediador di gobierno, a bisa cu tanten cu tin negociacionnan tumando luga y tanten cu tin un grupo di trahado grandi sin trabao
pasobra no tin un otro casino of casinonan cu lo por tuma nan, ta importante pa duna e oportunidad na e trahadonan aki. E situacion financiero cu e trahadonan ta aden, ta un situacion desesperante, pero si logra haya un reapertura di e casino, un grupo grandi di e trahadonan aki lo bay bek trabao, cu nan mesun condicionnan di trabao y por lo menos cu e mesun salario cu nan a bay laga pasobra e ta regla den ley. Diahuebs siman pasa a sinta cu e dirigentenan di FTA y nan abogado pa tende con leu nan ta.
Tin di compronde cu e siman aki lo intensifica e dos puntonan aki, pa purba di supera, esta e cantidad di trahadonan cu lo mester traha na momento cu e casino wordo opera y tambe e suma di placa cu tin cu wordo paga. Logico tin e discusion pa esunnan cu lo no sigui traha, cual tambe mester di un compensacion y un punto cu a bin acerca of t’ey semper ta cu maske cu nan keda cla mes e siman aki of otro siman, e operacion mes lo no cuminsa mesora, pasobra tin cu re acomoda, tin cu renoba e casino, cual tambe ta un debate cual e casino mes ta calcula cu mester di un periodo di dos luna. E punto ey ta wordo considera como chikito. Ta keda cu e speransa cu mientras e partidonan ta na mesa, lo por haya cu un apertura eyden den cual atrobe no ta garantisa trabao na tur hende, pero e grupo grandi lo por haya trabao, segun mediador di gobierno.
Tin di e trahadonan, un minoria, cu a haya trabao, permanente. E 44 trahadonan a busca algo di haci temporalmente, pero no den nan area. Tin cu tene cuenta cu tin trahado cu mas di 15 aña di servicio, pues casino ta nan profesion, consecuentemente ta hopi importante e ora pa tene cuenta cu lo trata mas posibel cu e mayoria di e trahadonan drenta traha eyden pasobra esey ta nan profesion cu nan conoce. Por ultimo mediador di gobierno a expresa cu e situacion aki a afecta e trahadonan severamente y nan famia, y si nan lo a bay traha otro caminda, nan no lo a haya e mesun salario cu nan tabata tin den casino.
