Tur hende mester para duro pa e periodo nos dilanti. Esey ta opinion di FTA y su presidente Hubert Dirksz. E siman aki lo tin dialogonan cu Gobierno, gremionan comercial y sindical riba e siguiente pasonan cu mester determina pa percura cu menos hende ta keda sin ningun clase di entrada pa motibo di e crisis di COVID-19, cu ta parce di ta empeorando e situacion economico na 2021.
Un aspecto esencial di e dialogo aki ta conscientisacion pa e realidad cu tur hende, incluso comercio ta confronta problemanan grandi. Y e problemanan aki tin impacto tambe riba entre otro e sector social. Aki ta unda e fundacionnan cu ta haci hopi di e trabou social aki ta confronta nan mesun problema, segun Dirksz.
Fundacionnan cu ta opera na interes di comunidad, for di Wit Gele Kruis te na SABA ta haya subsidio di Gobierno, pero awor ta confronta problema financiero. Hopi di nan ya caba tabata lucha cu falta di fondo y banda di e subsidio di Gobierno tabata busca fondo nan mes. E sosten di sector priva ey a baha drasticamente.
Y tin fundacion cu mester di fondonan pa cubri gastonan di operacion cu ta aumenta regularmente, ademas di ta traha cu personal specialisa, hendenan cu tin un educacion superior cu ta mara na salario mas halto tambe.
Realidad nobo
Aunke cu Gobierno ta cubri salario pa hopi fundacion, e suma no ta cubri henter e operacion di e organisacion. Consecuentemente, varios fundacion ta confrontando problema financiero y pa awor no tin forma pa nan por sali di dje. Y mescos cu ta e caso cu empleadonan publico, e subsidio di salario pa e trahadonan di fundacionnan tambe a conoce un reduccion di 12.5 porciento.
Hubert Dirksz ta bisa cu e problema di falta di fondo di fundacionnan cu ta haya subsidio no ta data for di momento cu e pandemia a dal Aruba, pero e crisis a empeora e situacion. “E fundacionnan aki ya caba tabatin problema y diripiente a haya menos placa, mientras cu nan tin obligacion, mantencion di edificio, gasto pa seguridad. Ya caba e placa no ta yega, y corta riba dje, pio e ta bira,” Dirksz a splica. “Ademas, e trahadonan aki cu ta ricibi subsidio di salario hopi biaha tin derecho igual cu ambtenaar, cu e mesun beneficio. Y tin algun di nan cu ta cay bou CAO. Pero, pa por enfrenta e realidad nobo, mester negocia cu e trahadonan.
Contexto historico ATV-dag
E negociacionnan por ta riba e beneficionan, particularmente e ATV-dagen. Y e ta importante pa realisa cu e beneficio di ATV-dag ta pa compensa locual ambtenaarnan a perde na 1985 pa motibo di e ciere di lago y mester a entrega un porcentahe salario e tempo ey. Ta cosnan bieu cu a keda traduci den e beneficio aki. Pero esnan cu a entrega, hopi di nan no ta den servicio mas. Hopi cu apenas a drenta a haya e esun beneficionan aki, mientras cu nan nunca a ‘perde’ of entrega algo. Den e sentido aki, Dirksz ta kere cu e beneficio di ATV-dagen ta realmente uno pa negocia. Den e temponan aki, tur trahado mester tin e boluntad pa aporta. Tur hende mester contribui.
E fastioso ta pa determina cuanto mester contribui. “Ken kier bay atras den entrada. Ken kier perde poder di compra. Consecuentemente e ta rekeri cu tur gremio mester ta serio den yega na un solucion hunto, den dialogo.
Dependencia
Si tin algo cu a pone tur hende na Aruba realisa si, ta cu dependencia riba turismo ta haci nos hopi vulnerabel. E ta un economia cu ta trece hopi placa lihe. Pero e ta asina fragil, cu a mustra cu realmente Aruba no tin nada pa para riba dje. Sin subsidio di Hulanda, e pais lo no por a wanta. Y ta keda na Hulanda pa determina con lo sigui yuda. “Nos ta den un crisis directo, cu nos no por sali di dje. Nos ta exporta servicio so. E sector financiero casi no ta existi na Aruba, Zona Liber tampoco. Y awor no tin claridad kico lo bay pasa tampoco.” Hendenan cu por gasta placa ainda, ta sigui permiti economia interno lora. E ta importante di un banda. Pero na mesun momento, si e placa caba, ta mas hende ta bay sintie. Y Dirksz tin miedo cu poco poco mas hende ta perdiendo e capacidad di por gasta, consecuentemente, un pelukeria, un carpinteria, tur cos ta dal para. E preocupacion ta cu e problema economico lo cambia den un pesadiya social.
conscientisacion
Lamentablemente, Presidente di FTA ta sinti cu esnan cu ainda tin trabou, cu ta trahadonan di fundacion, empleadonan publico, trahadonan di companianan semi publico, y hasta algun trahado di hotel cu no a perde trabou, no ta realisa e implicacionnan y ta actua manera nada a pasa. Politica tampoco ta yuda. Y aki ta wak tanto esnan den Gobierno como oposicion cu ta kere cu por hiba e mesun politica di semper y priminti cos cu ta imposibel, E sindicalista a cataloga cu ta ora pa esnan cu tin trabou ainda, ta parce di no ta consciente di e crisis enorme aki.
Reunion Mediador di Gobierno/SIWA
Mientrastanto otro instancia cu ta mira e desaroyo laboral cu wowo skerpi ta Mediador di Gobierno Anselmo Pontilius kende e siman aki lo reuni cu sindicato SIWA y e organisacion cu ta representa e ehecutivonan di WEB. Segun Pontilius, e forma con Utilities y Gerencia di WEB, y consecuentemente Elmar, a bin corta den salario di empleadonan sin cu a yega na un acuerdo cu nan, no ta muestra di respet. Pero realidad di Aruba ta cu mester ta solidario, y den concepto di Anselmo Pontilius, e trahadonan di WEB ta consciente di esaki. Nan tin un punto valido pa e forma con a dicidi di corta den salario sin negocia cu nan. “Pero mester contribui cu otro cu no tin trabou,” Pontilius a bisa Bon Dia Aruba. “Lo tabata bon si na nivel politico tambe tin un consenso con pa hiba e mensahe aki,” Mediador di Gobierno a bisa, ilustrando e balor pa tur lider politico na Aruba, irrespecto e partido realisa cu ta hunto mester enfrenta e crisis sin precedencia aki.
