No tur cos ta perdi y ainda tin alternativanan y speransa pa e partinan envolvi sinta na mesa cu cabes friu y evalua tur posibilidad y alternativa pa pone den operacion Aura Casino.
Mediador di Gobierno Anselmo Pontilius ta hopi optimista cu e siman aki lo surgi alternativanan faborabel tanto pa e hotel como pa e operado interesa, y pa e trahadonan tambe. Ya cu a pesar cu e operado cu lo kier tuma e casino a informa e sindicato cu ya nan no ta interesa, mester sondea ainda tur alternativa posibel.
Sr. Pontilius a declara cu su departamento ta preparando un of otro proposicion pa presenta tanto na e hotel y logicamente na e sindicato FTA. E ta spera cu entre awe y mañan si por y si tur partido ta di acuerdo, Mediador di Gobierno lo kier puntra nan si nan ta disponibel pa sinta na mesa cu un of otro alternativa cu Mediador kier presenta.
E ta haya cu independientemente di e situacion actual mester agota tur iniciativa pa wak con nan por sali di e situacion aki. Un parti di e atencion ta poni cu un parti di e trahadonan di Aura Casino cu for di december ultimo ta den incertidumbre laboral lo por haya trabou. “No tur, y nos tabata sa esey.”
Mediador di Gobierno a haci un gran esfuerso y e ta un situacion cu e departamento aki semper a keda vigila di cerca. Pero na momento cu e caso a cuminsa den corte, Mediador di Gobierno a bisa cu nan mester a para un banda ya cu ley ta bisa tambe cu tin otro arbitro pa atende cu esaki. A pesar cu e potencial operador di e casino a bisa cu no ta interesa mas, sr. Pontilius a bisa cu ainda ta existi speransa di por rescata e situacion aki.
A reis di loke a surgi den Corte, el a reuni cu minister di Labor pa analisa un rato. Ta asina cu nan a tuma e iniciativa pa cuminsa papia bek cu e partidonan. “Si boso nan tin un posibel solucion na caminda con leu ainda boso por rescata esaki”, esaki tabata e reflexion cu a wordo treci dilanti cerca e partinan concerni.
Sr. Pontilius a bisa cu ta logico cada partido tin e libertad di bisa loke nan kier bisa. Pero den su opinion personal ta cu e ta kere cu e partidonan por sali for di e situacion actual, independiente di e caso den Corte.
Island Gaming tabata e compania nobo interesa pa opera e casino na ex Occidental Hotel cu a dicidi di no opera mas e casino. E decision aki a cay despues cu nan no por a yega na un bon entendimento cu FTA cu ta e sindicato cu ta representa e 44 trahadonan di Aura Casino y cu a entabla un caso contra nan.
