Mediador di Gobierno, Anselmo Pontilius a laga sa cu lo atende debidamente cualkier keho of reclamo di FTA di intimidacion di parti di gerencia contra e trahadonan di Eagle Resort & Casino Aruba, cu a bay haci uzo di nan derecho constitucional durante tres referendum.
E referendumnan aki a tuma luga diamars ultimo pa e mesun compania, pero parti den tres NV: Aruba Development Corporation VBA, Eagle Aruba Casino Operating Corporation N.V. y Eagle Aruba Resort Operating Corporation VBA. Segun Mediador di Gobierno esaki no ta algo excepcional cu tin tres NV den un compania grandi. P’esey nan tabata tres referendum cu e departamento aki a convoca y realisa.
E prome tabata pa e parti administrativo. E di dos pa e casino y delaster tabata pa e hotel mes. FTA a gana esun pa representa e trahadonan di Eagle Aruba Casino Operating Corporation N.V. Mientras cu e otro dos referendum e sindicato a perde argumentando cu tabatin presion y te hasta intimidacion di e compania contra nan trahadonan.
Na final di e tres referendum cu a caba den oranan di atardi, Pontilius a declara cu ya caba FTA a yega di entrega e mesun dia un keho relaciona cu e prome referendum cu ta envolvi e trahadonan di e parti administrativo. El a splica cu Mediador di Gobierno unabes cu nan ta haya e tipo di carta aki, nan lo tin cu atende cu esaki y nan ta yama e partidonan, sea conhuntamente of separa.
Segun ley di referendum, si tin caso cu ta wordo comproba di intimidacion, lo por wordo convoca un referendum atrobe. E memoria di e ley ta bisa –segun Mediador di Gobierno– cu niun partido mag di obstrui pa eherce su derecho constitucional pa busca representacion sindical.
El a bisa cu un cos ta esun cu ta wordo bisa, pero di otro banda nan mester di prueba si loke FTA ta denuncia a sosode berdaderamente, y con el a sucede. “Niun hende por hinca den nan cabes cu nan por dun’e indicacion cu nan por afecta su trabao pa motibo cu el a bin haci uzo di su derecho constitucional,” el a declara.
Un dia prome di e referendum aki, Corte den Prome Instancia na Aruba a trata e peticion di parti di Eagle Resort & Casino Aruba contra Mediador di Gobierno, pa pospone e referendum bou di su empleadonan solicita door di sindicato FTA. Pero e peticion pa suspende e referendum a wordo nenga. Na final di e referendum representante di e resort menciona a prefera di abstene di duna cualkier declaracion na prensa relaciona cu e desaroyo di e tres referendum aki.
