Despues cu Mediador di Gobierno di Aruba a fungi temporalmente y pa varios luna como Mediador di Gobierno di St Eustasius y Saba, finalmente e no a sigui dunando su bon servicio na e islanan aki.
Cu hopi satisfaccion, Mediador di Gobierno, sr. Anselmo Pontilius a declara na e media aki cu despues cu el a asumi e posicion pa un periodo di tempo pa St. Eustasius y Saba, ya e Mediador di Gobierno di Sint Maarten encarga cu e dos islanan a cuminsa eherce su funcion.
E tempo aya sr. Bosman a wordo huramenta como minister, pero despues el a sali bek, y aworaki nan sr. Pontilius a bin cla cu su trabou, despues cu sr. Bosman a wordo huramenta bek como Mediador di Gobierno di St. Maarten pero tambe di St. Eustasius y Saba fei dia 1 di juli ultimo.
Pa e proceso di transicion aki, sr. Pontilius a tene recientemente un reunion cu su colega, sr. Bosman, pa asina pasa tur e tareanan cu nos Mediador di Gobierno tabata encarga cune, particularmente na St. Eustasius.
Sr. Pontilius a bisa cu den caso di sr. Bosman su ausencia den e funcion aki, e ta reemplasa su persona bek y den caso di sr. Pontilius su ausencia na Bonaire, e ora sr. Bosman ta reemplasa Pontilius na e isla flamingo.
Na Bonaire
Actualmente sr. Pontilius ta Mediador di Gobierno encarga cu Bonaire unda e ta atendiendo cu e sindicato y dunado di trabou cu algun proceso di referendum cu ta na caminda. Aunke s. Pontilius ta permanece na Aruba e tin un funcionario den e oficina di Mediador di Gobierno cu ta encarga di diferente asunto den su rol di secretario. Den caso cu e sindicato ta cumpli cu tur e rekisitonan di e referendum, e ora ey sr. Pontilius lo ta presente fisicamente pa conduci e referendum.
El a bisa cu e ley di referendum di Bonaire ta casi similar di esun di Aruba cu algun diferencia of cambionan minimo cu a bin den dje. “E ta e mesun ley cu den aña 1972 a tempo ey a wordo aproba na Antia, nan a haci algun modificacion, pero no grandi”, el a declara na Bon Dia Aruba.
Nan tin e mesun cantidad di rekisitonan cu particularmente e sindicato mester cumpli cun’e, caminda e dunado di trabou mester suministra informacion na Mediador di Gobierno.
