Prome cu ceramento di aña, Mediador di Gobierno sr. Anselmo Pontilius a premira cu e situacion di Aura Casino ta un batimento di bel cu mester atende debidamente cu e desaroyo cu ta tumando luga den e sector aki riba nos isla.
Sr. Pontilius ta considera cu atencion debido na e sector di casino ta un reto pa 2016. “Den mundo di casino tin preocupacion den sentido cu algun casinonan no ta na nivel cu nan a spera di ta. E ta un sector cu tin cu evalua seriamente den 2016”, asina Mediador di Gobierno a declara na e matutino aki.
Na momento cu entrevista a tuma luga tabatin y tin ainda problema cu algun operado di casino. Te hasta minister di Labor a vocifera recientemente cu nan a yega di tende di cierto casino cu realmente tin incertidumbre kisas na caminda, pero nan no por verifica esey actualmente.
Sr. Pontilius a indica cu casino ta un sector cu mester monitor hopi di cerca, con ta atende cun’e pasobra e ta considera cu tin varios sector cu ta hunga un rol importante. Un factor tin di haber cu e cantidad di persona cu ta disponibel pa gamble den casino. Pero otro tin di haber cu e costo di operacion di un casino cu ta halto, considerando e costo di personal cu ta uno halto. Y tambe otro costonan cu ta draai rond di nan.
