Cada bes mas e trahadonan ta buscando representacion sindical, te hasta den companianan unda nunca e trahadonan tabatin mester di organisa nan mes sindicalmente, debi na nan bon condicion di trabao y stabilidad laboral.
Sinembargo Mediador di Gobierno, Anselmo Pontilius a declara na Bon Dia Aruba ora cu e trahadonan ta cuminsa sinti e efecto di reduccion di nan salario y beneficionan secundario, nan ta busca refugio den un sindicato, locual ta nan derecho.
Esey ta haci tambe –segun Sr. Pontilius– cu tanto dunado di trabao como sindicato mester ta consciente cu e hecho aki no mester genera niun problema. Sino al contrario nan mester convivi hunto, pero denter di nan realidad, preparando e trahadonan tambe con e compania ta enfrenta e situacion aworaki.
E crisis aki ta siña e compania y e trahadonan con nan por prepara pa futuro pa cualkier otro crisis cu ta pone e trahadonan den problemanan grave di no por cumpli cu nan obligacion financiero, manera nos por mira den e temporada dificil aki.
E actitud aki mester por hiba e sindicato y e trahadonan na un pensamento distinto. Un pensamento lo ta si nan lo keda exigi beneficionan solamente pa awe so. Of nan lo purba di concentra ariba crea reserva y fondonan di spaar cu ta bira un cusinchi pa e trahadonan por wanta y soporta cualkier golpi.
Lamentablemente hopi di e trahado no tin un fondo di spaar, ya cu generalmente e trahadonan ta prefera di tin nan aumentonan salarial y tur suma di placa cu nan ta cobra. Mediador ta haya cu e recomendacion post crisis mester ta, si e compania ta paga un bono di fin di aña cu generalmente ta un salario completo, lo ta ideal cu anualmente e trahado por pone un 20% of 30% un banda como reserva pa momentonan dificil.
E ta kere cu mas cu nunca e crisis aki mester trece un enseñansa con bo lo tin cu cambia e acercamento pa e proximo añanan. Por ehempel e dunado di trabao ta bay analisa, aparte di e salario di e trahado, con nan por crea reserva pa e tipo di golpi cu hopi compania y trahadonan ta bin hayando pa consecuencia di e Covid crisis.
