Na final di e firmamento di contract colectivo (CAO) di cuater aña, entre e companianan di construccion afilia na WAB y sindicato STA, a keda expresa e competencia inhusto y falta di cumplimento den mundo di construccion. Esaki pa falta di control mas estricto cu ta haci cu companianan serio ta sufri e consecuencia di e situacion aki.
Mediador di Gobierno, Anselmo Pontilius kende a brinda su intermediacion pa logra e CAO aki, a bisa cu e no sa si gobierno ta na haltura cu den un pais chikito manera Aruba, nos por si nos kier, controla e companianan di construccion cu no ta cumpli cu ley cu consecuentemente ta ocasiona un competencia no leal. E preocupacion aki a wordo ilustra pa añanan varios biaha caba, pero ainda e ta continua.
E apelacion tabata directo pa gobierno, kiermen pa tur departamento cu por controla, mester realisa e trabou aki debidamente. Considerando tambe cu STA a calcula cu gobierno di Aruba ta perde di haya den caha mas cu 70 miyon florin pa aña for di impuesto di companianan di construccion cu ta baha bay, sin cumpli cu nan compromiso fiscal. Pontilius ta haya esaki un lastima, ya cu e ta un cantidad di placa cu tanto necesidad nos tin di dje, pero nan ta keda sin drenta na caha di gobierno.
Actualmente a wordo anuncia e construccion di por lo menos tres hotel nobo, entre nan Secrets Baby Beach Resort na Seroe Colorado. Pero e situacion ta asina cu esun cu ta paga pa construi, no ta obliga pa tuma e companianan local afilia na WAB na nan servicio.
Riba e asunto aki, Mediador di Gobierno a bisa cu sindicato STA a yega di indica algun proyectonan grandi, specifico manera Linear Park y Caya Grandi, caminda e companianan di construccion cu a yega di gana e bid no a cumpli cabalmente cu nan compromiso. Locual a haci cu e companianan afilia na WAB mester a finalisa cu e trabou aki.
E ta spera cu awor cu varios hotel lo wordo construi, e pregunta ta: con nos lo bay tene control? Esaki por lo menos cu cumplimento di ley cu ta exigencia y e ta un obligacion pa nos tur. Esaki no kiermen -segun Pontilius- cu nan no por trece trahado for di exterior. Pero e problema ta cu cada biaha cu nan ta trece trahadonan for di exterior, nos ta mira cu pa falta di conocemento di e trahadonan aki y nan temor pa nan wordo saca for di Aruba, ta explota e trahadonan aki facilmente.
Igualmente Mediador di Gobierno a bisa cu e tipo di compania no leal ey, ta abusa di nan trahadonan, caminda e primanan cu ta wordo desconta for di nan, no ta yega na AZV, SVb y loonbelasting… “Nos ta ripitiendo un disco cu ta casi bora caba, pero cu ta conoci”, el a bisa.
Pontilius ta haya cu si tin determinacion lo por bini cu control stricto. Ya cu na Aruba ta facil pa sa cual ta e proyectonan y tur hende sa ken ta encarga cu e proyectonan. Pero mirando cu e problema aki ta bin andando for di decadanan pasa, ta duna e impresion cu no kier controla loke mester wordo controla.
