Mediador di Gobierno Anselmo Pontilius: “Mester crea un fondo urgente pa atende cu e problemanan di adultonan mayor”

Foro Nacional pa Adulto Mayor a culmina despues di dos dia unda varios topico a ser treci dilanti pa diferente stakeholders y asina desaroya, formalisa y ehecuta un plan di maneho pa adulto mayor na Aruba. Den e foro, tabata presente e persona cu ta fungi como mediador di gobierno, Sr. Anselmo Pontilius, ken a sigura cu e foro aki tabata un instrumento mas pa atende cu un situacion di caracter nacional.

Na e momentonan aki, segun Pontilius a sigura, tin 110.000 habitante di cual por lo menos 20.000 ta riba 60 aña di edad caba. Riba su mes esaki no mester ta un problema, pero e problema di envehecimento ta un problema mundial den cual tin tratadonan caba pa wak con pa atende cu esaki. Den esey Aruba no ta un excepcion, simplemente ta mira cu e problema ta hopi mas grandi di loke ta kere cu e ta.

“Den sentido cu por ehemplo na e momentonan aki bo tende caba cu tin un lista di minimo 200 pashent wardando pa un luga pa keda. Si nan haya e luga mes pa keda, bo no tin suficiente personal cualifica pa traha eynan, esey ta e parti serio. Ademas di esey, e transporte pa tercera edad, cubrimento di remedi cu no ta cubri mas pa AZV, entre otro puntonan.”

Pa esaki, den e Foro Nacional pa Adulto Mayor, Pontilius a propone pa crea un fondo urgente pa atende cu e problematica aki, un fondo cu por lo menos mester tin entre 15 pa 20 miyon florin y tin varios proposicion con pa hacie, cu mester ta un fondo structural cu no mester ta pa un momento sino cu lo por yuda resolve of por lo menos alivia e situacion.

“Pero e ta un tarea pa termino medio y largo pa cual parlamento di tur gobierno cu lo sinta tin cu percura cu nos tin solucionnan urgente. Aworaki e luga di keda por ehemplo ta un problema serio, cu no tin luganan existente, con ta bay sostene e luganan priva; y na mesun momento cu nos ta auto-educa nos mes di tal forma como trahado hoben aworaki, con mi ta bay prepara pa futuro? Ta un cantidad di ciudadanonan cu a traha 30 pa 40 aña y ora cu nan a haya nan pension di behes y eventualmente un pida di pension adicional, si nan bay traha impuesto ta dal nan hopi duro. Pero na mesun momento cifranan di CBS ta bisa cu un hende sin 2.500 florin den nan man pa luna tin problema, dus con bo ta bay alivia nan?” Pontilius a puntra.

Esakinan ta tema cu ta bin riba mesa unda cu conhuntamente mester mira cu ta problema nacional y tambe na nivel nacional tin cu presenta solucion, manera el a splica.

Discriminacion tambe ta existi pa adulto mayor y tambe ta un tema cu a bin dilanti den e Foro Nacional. Y pa esaki, Pontilius a declara cu e pregunta ta con por haci pa alivia esey. Tur hende mester compronde cu mester tin forsa laboral, con ta bay atende cu esey cu ta algo sumamente importante y “cu speransa cu e gremionan mes tambe nan lo sali y enfrent’e hopi honesto. Esaki ta necesario, ya cu e ta un problema adicional pa nos sociedad.”

Tocante e fondo structural cu mester crea, Pontilius a bisa cu e trahadonan mes por cuminsa y Pais Aruba tin cu pone por lo menos su parti “urgente”, el a finalisa.