Ayera despues cu a wordo conoci e veredicto di corte riba e caso cu sindicato SIWA a entabla contra gerencia di WEB, interpretacion a wordo haci riba su impacto den mundo laboral y contra e figura huridico di e contacto colectivo (CAO).
Mediador di Gobierno, Anselmo Pontilius ta considera importante pa wak kico ta e criterianan cu hues a pone den e sentencia pa bay asina leu. Mediador su prome reaccion ta cu dunado di trabao di empresanan cu ta totalmente priva, sindicatonan y gobierno tin cu sinta urgente na mesa pa e sentencia aki no wordo mal uza of mal interpreta pa corta condicionnan di trabao existente.
Sinembargo e ta haya cu e ley cu ta rige nos contracto colectivo (CAO) ta un “ley solido.” Pero esey no kiermen cu un dunado di trabao, ni den sector priva completo y tampoco den companianan semi-estatal of semi-gubernamental por viola e contracto colectivo. “Mi ta kere cu esey ta hopi cla den e ley,” el a bisa.
Tin varios punto cu hues a señala. Un di nan ta cu mester tene cuenta cu e companianan semi-estatal y/of semi-gubernamental, nan riesgo pa perde trabao ta casi cero. Pero tambe hues a bisa cu e companianan aki como cu ya a yega di coopera caba aña pasa, lo ta normal pa sigui compronde cu e situacion no a mehora y cu e ta un crisis.
Pero e punto mas principal -segun Mediador di Gobierno- ta cu hues a bisa pa tene cuenta cu interes general. Sinembargo hues den su sentencia a laga espacio pa e sindicatonan di e compania estatal bay sinta na mesa y negosha exigencia di gobierno basa riba acuerdo cu Hulanda di 12.6%. Loke a yega di sosode aña pasa, y e aña aki tambe caminda varios empresa y sindicato a firma varios acuerdo.
El a referi cu den tur sentencia cu nos a yega di mira den ex Antia y na Hulanda, interes general semper ta bay prevalece riba derecho colectivo of individual. Nan ta sali for di punto di bista cu e crisis no ta pa semper. Hopi biaha e mesun sentencia ta indica cu un momento bo ta entrega, pero na momento cu crisis pasa, bo ta bay bek eventualmente na e situacion normal.
Sinembargo Mediador di Gobierno no ta descarta cu den caso di e relevancia di SIMAR versus WEB N.V ta importante pa wak su implicacion. Si en berdad den un compania cu ta totalmente priva -ya sea cu tin un CAO of no- si basa riba e sentencia di ayera, si e ta bira un antecedente of referencia huridico pa e compania haci mesun cos. Kiermen si e compania por dicidi cu tin un crisis y cu e compania pa sobrevivi e tin cu kita un cantidad di bo derechonan y beneficionan hancra den bo CAO. Of si di bo contracto individual bo dunado di trabao por kita derechonan unilateralmente.
Sinembargo aña pasa ora cu nos a lock down tabatin varios compania cu a aplica ‘not work not pay’ ya cu nan a wordo obliga di cera. Esaki por wordo mira como un comienso di e situacion actual.
