Den su tarea di mediacion, departamento di Mediador di Gobierno a propone un reunion cu e diferente autornan pa atende e solicitud cu Camara di Comercio di Aruba (KvK) a expresa pa director di departamento di Labor y tambe Minister di Labor, habri e posibilidad di entrega di peticion pa retiro.
Nan ta mira esaki como un forma pa salvaguardia otro cuponan di trabao cu ta den peliger, y principalmente pa mantene sobrevivencia di e negoshinan den e crisis di coronavirus cu nos ta aden actualmente.
Nan ta hayando ayudo di subsidio di salario for di gobierno pa mantene mas puesto di trabao posibel. Sinembargo e no ta suficiente pa e empresanan, fuente di trabao, por sigui draai. E preocupacion aki a drenta indirectamente caba na departamento di Mediador di Gobierno.
Recomendacion
Den su funcion di Mediador di Gobierno, Anselmo Pontilius, ta indica cu apesar di e otro problemanan cu nos pais ta atende cune, manera financiamento di Hulanda y e crisis mes di salubridad debi na Covid, e ta kere cu ta recomendabel y importante na e momento aki, pa trata di scapa mas tanto compania posibel, y logicamente por scapa mas cupo di trabao cu ta posibel.
E ta bira un dilema, pasobra di otro banda, tin compania cu ta desea di no manda e trahadonan cas. Nan ta trahadonan cu e companianan a inverti den nan. Pues trahadonan cu nan a prepara y nan temor ta cu si un momento nos recupera nos economia, nan no ta bay haya e trahado cualifica cu nan a perde.
El a bisa cu ta recomendabel pa gobierno, dunado di trabao y sindicato, evalua por ehempel e situacion minimo di cinco luna, for di augustus pa december, cu relativamente ta poco. Ya cu normalmente e evaluacion aki mester ta di full un aña debi cu e crisis ta enorme. Logicamente e situacion di Merca y Canada, nos tur sa con e ta y con nan por afecta ainda mas nos principal sector economico. Pero speransa ta cu Aruba por haya un ocupacion di 40% of maximo 50% di acuerdo cu pronostico di ATA.
E panorama aki no mester exclui cu e dunado di trabao cu no ta haya espacio pa pidi permiso na departamento di Labor lo cana e caminda pa bay corte pa atende cu peticion di retiro. Ya cu den e instancia aki no tin forma pa stop e dunado di trabao si e ta cana e caminda debidamente. Naturalmente e ta un caminda mas costoso, pero menos burocratico.
Aparte di e solicitud si departamento di Labor tin cu atende cu e peticion di retiro individual ta surgi e pregunta -segun Pontilius- si tin otro formulanan? E no ta facil pa haya un formula pa motibo cu por ehempel, si ya caba tin trahado cu ta hayando 60% di nan salario, e pregunta ta, con menos e ta bay ta?
E buskeda di formula pa mantene sobrevivencia di mas empresa y mas cupo di trabao no ta facil. E ta depende si tanto dunado di trabao y sindicatonan por yega na dje, ya cu hopi dunado di trabao no tin un sindicato paden di nan empresa, y nan tin cu atende cu e trahado su so.
P’esey Mediador di Gobierno ta considera hopi importante pa nan bolbe manda nan recomendacion pa tin un tipo di encuentro tripartiet entre dunado di trabao, gobierno y sindicato, pa reevalua e situacion actual y perspectiva pa futuro. Nan mester evalua for di despues di maart te aworaki con e situacion a afecta caba. Locual ta conoci caba caminda un cantidad di empresa no a sobrevivi of no lo sobrevivi. Pero tambe con nan lo sigui for di awor te december, si no bin algun tipo di ahustacion.
