Recientemente Arubaanse Voetbal Bond (AVB) a tene un reunion informativo cu mayornan y hungadonan cu ta forma parti di e academia U-15 y U-17. Na e reunion aki a duna, entre otro informacion kico ta encera e academia, pero tambe kico ta spera di e hungadonan, kico ta spera di e mayornan, con ta organis’e, con e tin cu bay, kico ta come y bebe di e academia.
E ta algo nobo na Aruba, asina ing. Richard Dijkhoff, Presidente di AVB, a indica. Pa hopi hende e ta algo diferente, specialmente e forma con ta organisa, administra y maneha e academia aki. E academia a inicia diadomingo di 8:00am pa 10:00am pa muchanan di U-15 y 10:00am pa 12:00pn pa U-17. AVB a haya su mes ta organisa e trainingnan na e orario aki pa motibo di espacio cu tin durante siman na e facilidadnan.
P’esey a bira importante pa yega na mas espacio y ta trahando riba esey tambe. A mira un entusiasmo grandi bou di e mayornan y sigur e hungadonan a compronde e concepto cu a bini cune. AVB a haya cooperacion di e mayornan, pero tambe a duna nan compromiso pa haci e proyecto aki uno exitoso.
E reunion organisa cu e mayornan pe AVB Academy a bay bon mirando e cantidad di persona presente. David Abdul, Coordinador di AVB Academy, a indica cu mas di 100 persona tabata presente, tanto mayornan como e muchanan. Por a mira cu tabatin hopi interes den e presentacion di e academia, cu ta un (sub) proyecto den e programa “Grow Football”. Den e programa aki tin desaroyo di club, desaroyo di coach, desaroyo di talento y e diferente National Youth Teamnan y e seleccion nacional. Durante e presentacion a papia riba desaroyo di talento, unda cu e academia di AVB ta cay bou dje.
Desde cu David Abdul ta bek na Aruba, el a analisa cu e hungadonan na Aruba por ser cualifica como mes un bon cu e Hulandesnan. El a indica cu unda Aruba tin pa gana ta den e parti di disciplina y mentalidad. Esey ta un punto hopi importante, pasobra pa ta un bon futbolista no ta solamente cuanto gol ta hinca of cuanto hende bo ta hala na banda. Pero ta e pakete completo di fisica, disciplina, mental, tactica y comunicacion. “Futbol no ta solamente con bon bo ta. Mi ta kere mentalidad ta un parti hopi importante,” el a expresa. Tambe inzet ta cay aden, cuanto gana tin pa logra e meta, cuanto gana tin pa bira e profesional cu kier bira. E ta kere cu eynan ta unda por saca probecho di dje.
E reunion a bay bon y a cuminsa cu algo nobo, pero kier a haci un anochi informativo pe mayornan pa asina por cera un compromiso, asina sr. Reynaldo Geerman, Secretario General di AVB, a indica. Durante e anochi aki a tuma luga firmamento di contract entre e hungadonan, mayornan y AVB, caminda a pone e reglanan, e criterianan cu e mucha ta participa den e academia. AVB a cuminsa cu e informacion di e prome aña, pero e ta un proceso cu lo keda. Segun Reynaldo Geerman, si e ta bon a crea un structura cu lo tin un scol di futbol pe añanan cu ta bin.
E no ta un cos cu ta stop, asina el a indica. Den e academia a cuminsa cu 4 categoria, esta U-13, U-15, U-17 y U-20. E intencion ta cu mas den aña lo cuminsa cu U-9 y U-11 tambe, kiermen ta cover tur aspecto di un curriculum di scol bo ta pasa den e academia. Obhetivo di e academia ta pa saca muchanan cu tin talento, hinca nan den un ambiente cu guianan profesional y mehora nan parti futuristico. No solamente e parti tactico di futbol, pero tambe tecnico di futbol y como persona.
AVB ta hopi contento pasobra e tabata un necesidad pa yuda forma un hungado, pero pe organisacion e ta un producto di a cuminsa cu e academia, pero ta parti di un pakete di programanan cu AVB ta ehecutando aworaki cu e proyecto di “Grow Football”. Lo sostene e parti di clubnan tambe. Ta bezig cu un “pilot project” cu e clubnan, unda e desaroyo ta cuminsa for di e club y di eynan ta bay na e academia. Di e academia e ora ta bay seleccion, asina Reynaldo Geerman a indica. No solamente e nivel di futbol di parti e academia ta bay subi di categoria, pero tambe AVB ta yudando e clubnan mehora nan training pe por acopla cu e academia. Caminda e muchanan cu no ta den e academia asina mes ta haya un parti di e curriculum di e academia na e clubnan.
