Den e ultimo 2 añanan aki, Aruba a conoce dos caso caminda mayornan a perde nan yiu den trafico. Ta trata di e caso di Bruce Arends y Zinnia Croes. Ambos caso ainda no a logra yega na un asina yama ‘closure’ pa e mayornan ya cu tur dos famia ta bringando derecho di nan yiunan cu ya awe no ta cu nos mas. Locual cu mayornan ta señala den ambos caso ta foutnan tecnico cu ta tuma luga durante investigacion sea pa Ministerio Publico, Cuerpo policial of otro instancia concerni. 

Caso Bruce Arends
Den e caso di e hoben Arends, kende a perde su bida den un accidente riba caminda grandi di Pos Chikito, mama di e fayecido a demostra con e mester a cana un caminda di cruz pa yega na documentonan di e investigacion. Den un entrevista extenso cu Bon Dia Aruba, a mustra con entre otro no a haci test pa alcohol riba e chauffeurnan mientras cu tabata tin tur indicacion pa haci esaki. A mustra tambe con den potretnan forensico tabata tin algun spoor cu no a keda inclui den e rapport di polis.

E reportahe completo aki lo ta den e edicion di diabierna y lo por wak e video tambe di e entrevista riba mesun dia pa medio di e pagina di Facebook di Bon Dia 24

Caso Zinnia Croes
Durante un conferencia di prensa yama pa mayornan di hobencita Croes, conhuntamente cu abogado di e famia, a elabora riba e situacion di e caso. Zinnia a perde su bida despues di a wordo alcansa pa un auto cu tabata ser maneha pa un polis dama na civil kende lo tabata bou influencia di alcohol. Den e caso aki, mayornan y abogado ta mustra cu tin cosnan cu no ta cuadra manera entre otro cu e rapport forensico no a ser firma y tampoco den tur e tempo cu a pasa no a haya un carta oficial di Ministerio Publico unda tin un decision oficial di si lo persigui e agente of no.

Tur dos caso mayornan ta sinti cu nan yiu no a haya un trato manera nan ta merece. For di tur dos famia ta cla cu pa nan no ta trata di haya placa pa daño y perhuicio ni tampoco pa tormenta e otro partido cu castigo penal. Tur dos famia a expresa di kier pa husticia atende nan caso debidamente y cu tin un huicio husto. “Si mi yiu ta robes, mi lo acepta esey pero a conden’e sin dun’e un trato husto”, tabata expresionnan haci pa mama di Arends.