Desde dialuna 25 di mei cu ta cuminsa e fase 2 di reapertura di economia, algun scolnan como crèche lo cuminsa ricibi nan alumnonan despues di dos luna di ausencia pa via di e virus COVID-19, pero te ainda ta existi cierto inkietud entre e mayornan pa loke ta trata e salud di nan yiunan.

Crèche of centro di cuido di mucha di 0 pa 12 aña ta forma un parti importante di economia pa motibo cu nan ta esunnan cu ta atende e muchanan ora nan mayornan ta den nan trabou, specialmente den e momentonan aki cu economia lo cuminsa habri bek y e comunidad lo adapta pa e normal nobo.

Ya desde algun dianan pasa, scolnan a cuminsa traha nan protocol pa cuminsa ricibi nan studiantenan y asina por mantene un ambiente mas sigur y saludabel, pero tambe ta existi mayornan cu no ta sinti cu esaki ta momento sigur pa hiba nan yiunan mas chikito pa scol.

Manera tur hende sa, COVID-19 a bin cu hopi cambio pa e bida normal y pa e motibo aki scolnan mester traha na mesun protocol y informa e mayornan, asina como tambe mester tene na cuenta si studiantenan of docentenan tin cualkier problema di salud of di otro circunstancia.

Di esaki, Departamento di Salud a informa cu hunto Ministerio di Asuntonan Social y Fundacion pa Nos Muchanan nan a traha un Protocol Nacional pa centronan di mucha pa asina tur mester ta den mesun linea ora ta trata di prevencion di COVID-19.

Actualmente ta existi 117 centro di cuido di mucha registra na Fundacion Pa Nos Muchanan pero te ainda ta existi algun di nan cu no a wordo registra caba pa cu esaki, tur di nan a haya un protocol pa preveni infeccion di COVID-19 y su criterionan ta conta pa tur tipo di cuido di mucha entre 0 pa 12 aña, e ehecucion di esaki ta keda bou responsabilidad di e cabesante, directiva of propietario di e scol cu tambe mester percura pa tin control di parti di instancianan gubernamental y cu ta cay bou Ministeriele Regeling.

Ta existi cierto inkietud entre mayornan pa loke ta trata e distancia social entre mucha y si esey lo funciona entre esunnan mas chikito, den e protocol aki e medidanan mas importante ta cu entre muchanan no mester tin 1.5 meter di distancia pa motibo cu ta casi imposibel pa siña muchanan chikito pa tene distancia social.

Na e momento di busca e mucha, un adulto so por hiba y busca e mucha, tambe cu cada centro ta organisa di un manera responsabel y segun reglanan di DVG con esey lo pasa, nan por traha e direccion na unda nan mester cana pa drenta y pa sali, tambe tin e opcion di palabra cu e mayornan e orario pa hiba y busca e mucha pa asina preveni aglomeracion di mayornan na entrada di scol.

Den e centro di cuido e normanan di higiena mester ta presente como por ehempel, tin un hand sanitizer na entrada di scol y cada espacio como, esun di come y di cambia pamper, mester sterilisa tur coy di hunga y muchanan no por hiba nada di esey pa su scol y haci limpi tur e area di un manera mas consecuente cu antes.

Di loke ta trata e areanan y instalacion sanitario di e crèche, semper mester ta limpi y desinfecta cada biaha despues cu e mucha a us’e y mester tin por lo menos 1 toilet y labamano aparte pa e personal, mayornan of bishitantenan.

Mayornan mester percura pa cu e mucha haya su propio cuchara, forki, tayo y beker asina como tambe e centro di cuido mester tin awa limpi pa bebe tanto pa muchanan como pa e personal conforme cu e normanan di Departamento di Salud Publico.

Tambe ta recomendabel pa pega poster den e centro cu instruccionnan di bon uso di awa y habon y cu informacion importante pa laba man y tin un bon higiena, tambe ta importante pa tene hopi pasenshi y siña e muchanan con nan por haci esey, ya cu despues di keda dos luna den cas algun por a lubida cierto reglanan.

Mayornan tambe tin un guia ora nan yiunan bay su crèche bek pa asina nan tambe tin un ayudo pa loke ta trata muchanan mas chikito y prepara nan di un manera mas dibertido, di mesun manera tambe por splica pa nan yiu cu den algun momento nan por mira hende cu mondkapje y glove pero esey no ta nifica cu nan ta malo, sino cu esey ta un medida di siguridad.

E mayornan tin e decision den nan man si nan lo kier cuminsa hiba nan yiunan pa scol e proximo dialuna 25 di mei, p’esey nan tin e tarea di transmiti pa nan yiu e normanan di un manera positivo y senciyo pa asina nan por cuminsa compronde e situacion.