E situacion di Lunah, di cual su mayornan ta bringando den corte pa haya tur tratamento paga pa AZV, ta deteriorando rapido.
Esaki e mayornan ta informa riba e pagina dedica na nan yiu muhe, esta The Light of Lunah. Diamars nan a post cu nan a ‘perde’ nan cas, percura pa Ronald McDonald Houses. Esaki pasobra nan situacion a tarda di mas, teniendo cuenta cu e caso contra seguro nacional AZV.
Manera conoci e veredicto den e caso ta posponi te 7 di mei. Sinembargo Lunah su bida ta depende di tratamento. Fin di november aña pasa hues den un caso sumario a dicidi cu AZV mester percura pa Lunah haya tratamento na Children’s Hospital Utah, anticipando e veredicto den e caso profundo. E veredicto mester a cay e luna aki pero a hala e fecha pa mei.
E tardansa tambe tin efecto riba e tratamento di Lunah, como cu e mayornan ta bisa awor cu AZV ‘ni kier aproba un plan nobo pa trata su PH activamente y efectivamente’. “No mester menciona mes cu pa motibo di e posponemento di su operacion (pendiente e caso, red.) el a yega asina leu.”
Pues segun e mayornan den e caso cu Lunah lo a haya e operacion mas trempan, manera a pidi AZV, esaki lo no a pasa y no tabata necesario.
No tin un reaccion awor di AZV. Despues e caso sumario, e seguro a comenta: “Segun e hues, un caso sumario no ta e medio adecuado pa duna un veredicto (contesta) riba e pregunta ey (si e seguro mester cubri e tratamento si of no, red.) Pa esey a referi na e bodemprocedure. E hues a considera cu na e momento aki e interes di baby Lunah ta pisa mas cu esun di AZV, mirando cu su decision no ta irreversibel pa AZV. Si en caso resulta den e bodemprocedure cu AZV a tuma un decision corecto, ainda AZV por recupera e gastonan bek cerca e mayornan di baby Lunah.”
Punto principal pa nenga pa cubri gastonan di tratamento di Lunah segun AZV, ta cu e tratamento ta experimental y e pronostico di bida pa muchanan naci cu deficiencia manera esun di Lunah (Trisomy 18), no ta bon.
