Ayera e mayornan di Lunah a gana e caso sumario contra AZV. Nan a bay corta pa forsa e seguro nacional pa paga pa operacion/tratamento di nan yiu. Den un reaccion AZV ta bisa cu nan lo cumpli cu e decision temporal di hues.
E mayornan di Lunah ta luchando desde su nacemento pa ricibi tratamento. Lunah a nace cu Trisomy 18 cual ta un deficiencia cu entre otro a haci cu e mester di un operacion di su curason. Sinembargo AZV a nenga esaki despues di consulta cu specialistanan local, di Hulanda, Colombia y hasta Merca unda Lunah ta keda tur e tempo pa ricibi tratamento cual e mayornan mes ta financia cu ayudo.
Den un relato manda ayera nochi AZV ta informa cu ‘mester cubri e gastonan di e tratamento pa baby Lunah manera e ta wordo indica door di Children’s Hospital Utah na Merca. Entre tanto, AZV a tuma contacto cu e hospital pa regla esaki mas pronto cu ta posibel’.
E compania di seguro ta sigui splica: “Den ley di AZV (articulo 11) ta stipula cu un asegurado tin derecho riba cuido medico specialisa segun cu ta comun y coriente dentro di dicho specialisacion. Den e caso di baby Lunah AZV a busca diferente conseho di expertonan medico for di Hulanda, Colombia y Merca. A base di e recomendacion, unda e expertonan ta indica cu e tratamento pidi no ta comun y coriente den casonan manera di baby Lunah, AZV a nenga e peticion di e mayornan.”
E mayornan despues a apela e decision, cuminsando un caso administrativo (LAR). Segun AZV, e comision di LAR ‘a declara e peticion infunda y a mantene e decision di AZV’. E ora e mayornan a dicidi di bay corte pa apela e decision di LAR. Pendiente e tratamento di e procedura aki cual ta un caso profundo (bodemprocedure) cu ta tuma mas tempo y l lo wordo trata na januari 2018, e mayornan a apela pa un medida temporal por medio di un caso sumario.
E hues den e caso sumario no a duna un veredicto tocante e pregunta si AZV a atende e caso di baby Lunah corecto of no, asina e seguro nacional ta bisa. “Segun e hues, un caso sumario no ta e medio adecuado pa duna un veredicto (contesta) riba e pregunta ey. Pa esey a referi na e bodemprocedure. E hues a considera cu na e momento aki e interes di baby Lunah ta pisa mas cu esun di AZV, mirando cu su decision no ta irreversibel pa AZV. Si en caso resulta den e bodemprocedure cu AZV a tuma un decision corecto, ainda AZV por recupera e gastonan bek cerca e mayornan di baby Lunah”, asina AZV ta bisa den nan comunicado.
