E mayornan di baby Lunah cu awor ta na Merca pendiente un operacion crucial pa curason, ta traha riba un caso sumario contra AZV.
Esaki e mayornan Jurrie Rijksen y Liandha Garcia a anuncia den un articulo cu a sali awor den e fuente Hulandes, AD.
AZV a nenga di compensa e gastonan di e operacion di curason pa motibo cu e conseho di doktornan na Aruba y Hulanda ta negativo. E seguro nacional tampoco ta kere a base di e consehonan medico cu esaki e operacion lo yuda prolonga e bida di baby Luha.
Lunah tin 11 luna awor y a naci cu Trisomie 18. Momento cu el a nace e mayornan a experiencia problema cu e seguro pa motibo cu perpectiva di muchanan aki no ta grandi. AZV ta riba e punto cu e prognostico di bida no ta mucho positivo y asina tambe ta nenga tratamento a base di consehonan medico.
Na januari su caso a hala hopi atencion caba pa motibo cu e mayornan a pidi pa un operacion di su stoma pa aliva su situacion pero AZV a nenga esaki y a propone un tratamento cu remedi pa motibo cu e operacion tin hopi riesgo como cu su curason ta hopi debil.
E mayornan a protesta y finalmente a hiba Lunah riba nan propio gasto pa Colombia unda un hospital si a acepta e baby pa opera. E operacion a bay bon. Finalmente AZV a dicidi cu lo cubri e gastonan.
Despues e mayornan a dicidi di bay Merca pa opera su curason pero atrobe e seguro ta nenga compensacion. E mayornan ta bisa cu nan tin un hospital esta Primary Children’s Hospital na Salt Lake City cy tin experiencia cu pashentnan manera Lunah y ta willing pa opera e baby Arubano. Sinembargo e seguro ta nenga e peticion y e mayornan a bay den bezwaar. Awor nan kier bringa nan caso den corte. E operacion ta costa mas o menos 400 mil florin.
