Ayera a tuma luga e caso di baby Lunah contra AZV den corte. Aki ta unda cu hues a dicidi na fabor di famia Rijksen y a dicta cu AZV tin cu cubri e gastonan medico di Lunah Rijksen cu actualmente ta na Merca.

E mayornan di Lunah no a logra cu AZV pa asina paga e gasto di e vuelo di ambulance pa Merca, na unda Lunah lo a haya un inspeccion. Hues a rechasa e demanda cu nan tabata tin contra di minister di Salud.

AZV

Mirando cu esaki ta un caso di principio pa AZV tocante interpretacion di e ley di AZV, lo apela e sentencia. AZV lo cumpli cu e sentencia y lo paga e gastonan di un eventual operacion di curason di Lunah Rijksen. Ta importante pa tin claridad tocante e interpretacion di kico ta un tratamento usual den e grupo di profesion di specialista medico.

Caso
Lunah a nace cu Trisomie 18. Na momento cu el a nace e mayornan a experiencia problema cu e seguro pa motibo cu perspectiva di muchanan aki no ta grandi. AZV ta riba e punto cu e pronostico di bida no ta mucho positivo y asina tambe ta nenga tratamento a base di consehonan medico. E mayornan a protesta y finalmente a hiba Lunah riba nan propio gasto pa Colombia, unda un hospital si a acepta e baby pa opera. E operacion a bay bon. Finalmente AZV a dicidi cu lo cubri e gastonan. Despues e mayornan a dicidi di bay Merca pa opera su curason, pero atrobe e seguro ta nenga compensacion.

E mayornan ta bisa cu nan tin un hospital, esta Primary Children’s Hospital na Salt Lake City y tin experiencia cu pashentnan manera Lunah y ta willing pa opera e baby Arubano. Sinembargo e seguro ta nenga e peticion y e mayornan a bay den bezwaar. Durante luna di april e caso contra AZV a wordo posponi. Pa motibo di tardansa nan a ‘perde’ nan cas, percura pa Ronald McDonald Houses. Esaki pasobra nan situacion a tarda di mas, teniendo cuenta cu e caso contra seguro nacional AZV.

E tardansa tambe tabata tin efecto riba e tratamento di Lunah, como cu e mayornan ta bisa awor cu AZV ‘ni kier aproba un plan nobo pa trata su PH activamente y efectivamente’. “No mester menciona mes cu pa motibo di e posponemento di su operacion (pendiente e caso, red.) el a yega asina leu.” E punto principal pa nenga pa cubri gastonan di tratamento di Lunah segun AZV, ta cu e tratamento ta experimental y e pronostico di bida pa muchanan naci cu deficiencia manera esun di Lunah (Trisomy 18), no ta bon.