Mayornan di Elida Arteaga ta haci suplica na autoridadnan pa haya sa kico a pasa cu nan yiu

Elida Maria Arteaga Barreto di 28 aña di edad a fayece den circunstancianan straño, na unda su mayornan ta pidi autoridadnan pa haya claridad den su caso. A haya su curpa, cu varios golpi, na su cas na Savaneta.

Su mama Luz Marina a conta den un entrevista na e medio di comunicacion Noticia Impacto cu el a haya un yamada di polis indicando loke a sucede na su cas. Ora el a yega el a topa e curpa di su yiu benta riba vloer. Pero prome cu el a yega, el a bisa cu un hende a drenta, a saca potret y a graba un video.

Un hende a mustra e video aki na e mama y a menciona cu pa e posicion con su yiu a wordo haya, ta indica cu e no por a mata su mes. El a bisa cuu dia di su entiero el a constata cu su yiu no tabatin un huña, tabatin golpinan. El a bisa cu “pa e mes mata su mesun curpa tabata dificil, pa e posicion con el a keda, pasobra e tabatin su brasa mara y su nek tambe tabata mara. Pa mi ta imposibel cu el a haci esey y mi kier claridad di loke a pasa cu mi yiu.”

E mama ta pidi pa autoridadnan concerni haci un autopsia pa haya sa kico a pasa. El a bay polis, unda a sigura cu nan no tin un rapport ainda y e ta sinti cu e caso ta hopi keto y cu e mester un clarificacion.

Elida Maria, segun su mama a conta, tabatin plannan. El a yega di bisa cu e tabata kier caba su estudionan na Hulanda. Como mama, e ta pensa cu su yiu no tabata capaz di comete suicidio, pa motibo cu e tabatin hopi cos pa haci ainda. Como mama e ta sinti cu su yiu no a mata su mes.

Elida Maria tabata un persona hopi social. Su amigonan di Universidad di Aruba, unda e tabata studia Marketing Internacional, a haci un homenahe na dje. Su mama tambe a trece dilanti cu poco tempo pasa el a caba un relacion sentimental.

Segun el a menciona, autoridadnan te ainda no a duna informacion di e caso di su yiu y e ta haya esey straño, pa motibo cu normalmente algo asina ta sucede nan ta tuma den beslag diferente articulo y nan no bay cu ningun pertenencia di Elida Maria. “Polis no a bay cu nada, nan no a averigua nada”, el a bisa. Ademas, el a comenta cu e ta wardando un yamada di autoridadnan.

Di su parti, e stiefvader di Elida Maria, di nomber German a señala cu e no ta haya normal con autoridadnan ta tratando e caso, cu ainda nan no sa si ta trata di un suicidio of di un asesinato. “Loke nos ta evidencia como tal, esaki no ta parce un suicidio. Mi a mira e potret cu un hende a saca ora a drenta den e cas, y normalmente ora un persona ta mata su mes, e brasanan ta keda abao.”

E cas unda e hecho aki a tuma luga, segun e tata ta conta, ta ubica cerca di Marinierskazerne na Savaneta. E anochi cu nan a haya sa kico a pasa cu Elida Maria, el a haya sa cu e persona doño di e cas a pidi pa saca e pertenencianan di Elida Maria di e cas. “Esey tabata evidencia, pero pa no causa problema cu e persona ey, nos a saca tur cos di e cas den oranan di marduga.”

Pero tin un detaye cu ta hala atencion, ya cu el a bisa cu e mama di e doño di e cas no kier entrega e telefon di Elida Maria na su mama, cu segun e tata e ta algo cu ta sirbi como evidencia.

Riba e cama di Elida Maria tabatin un hamburger, cu por ta cu Elida tabata comiendo na e momento ey y su laptop tabata cendi. “Esey no ta normal cu e por a mata su mes di e forma con e curpa a wordo haya.”

Diaranson di siman pasa ora e acto di entiero a tuma luga, nan a wak tur e golpinan riba Elida Maria, huñanan ranca, sanger riba su T-shirt y algun rasca na su brasanan. “Como si el a purba di defende su mes. Mi no ta kere el a mata su mes pasobra e tabata studiando un carera cu casi tabata termina y presenta su tesis. Pero e evidencia te ainda no a wordo mustra den publico pasobra ta un caso cu Recherche tin cu aclaria”, German a indica.

Despues cu nan a sali di acto di entiero, nan a bay polis di San Nicolas pa haya sa mas di e caso di Elida Maria cu a tuma luga diamars di siman pasa. “Nan a bisa mi cu nan no tin nada, pasobra supuestamente el a mata su mes, pero ma bisa no. Nos a wak evidencia cu ta mustra cu e no por a mata su mes y mi a mustr’e esey cu e potretnan cu nos tin. E ora ey nan a bisa cu nan ta bay tuma contacto cu otro Recherche. Pero te ainda, nos no a haya ni un yamada.”

Nan como mayornan ta desespera debi cu nan ta sigura cu no tin avance den e caso. Nan kier haya sa kico a berdaderamente a sucede cu nan yiu. Tin hopi pregunta cu mester haya contesta di parti di autoridadnan y Ministerio Publico, ya cu nan ta indica cu Elida Maria no por a mata su mes.

Nan ta bay sigui keda insisti pidiendo clarificacion riba e caso, unda nan a laga un mensahe na minister di Husticia, Rocco Tjon pa actua den e caso aki di Elida Maria Arteaga Barreto, ken a fayece den circunstancianan straño mas di un siman pasa y cu te ainda no tin un indicacion di kico por a pasa cune.

Elida Maria a wordo reconoci cu e premio di “Student Ambassador Award” na aña 2021 pa Universidad di Aruba como un studiante cu semper tabata dispuesto pa yuda otro studiantenan den loke nan tabatin mester.