Despues cu famia a paga hospital pa por haci e autopsia na e curpa di Elida Maria, nan a confronta e tristo noticia cu autopsia no lo tuma luga, causando hopi indignacion y tristesa ya cu nan kier sa con el a muri algun siman atras y nan no ta haya contesta di autoridadnan concerni.

E caso aki ta sigui trece hopi preguntanan y incertidumbre tanto di famia como di comunidad unda no tin un contesta precies di kico a sucede cu e hoben di 28 aña cu a muri den circunstancianan straño.

Den un entrevista diasabra atardi den e medio Noticia Impacto Luz Marina Barreto e mama a expresa cu warda di polis San Nicolas a bisel’e cu nan a conclui cu Elida a mata su mes, minuutnan despues el a haya un yamada di hospital informado cu e autopsia di su yiu no lo tuma luga, “nan a yama mi y bisa mi cu nan a haci un fout, cu nan ta bay debolbe mi e placa bek”.

El a reitera cu na ningun momento el a haya sa e cifra cu a wordo publica riba algun medionan di comunicacion cu e autopsia tabata costa 8.000 florin, el a sigura cu solamente el a paga 300 florin na hospital y esey ta e placa cu hospital ta bay dun’e bek.

“A mi kier pidi na esunnan concerni cu mi kier haci e autopsia na mi yiu pasobra pa mi tin hopi inconsistencia den e cosnan cu e tin den su curpa, como huñanan ranca, solamente mi ta pidi un autopsia pa mi yiu”, el a sigura.

Dos siman a pasa y te ainda e mayornan no ta haya contesta, segun polis a conclui Elida a mata su mes manera e mama ta declara.

Tata di Elida, Jose Joaquin Arteaga, cu ta biba na Colombia a yega na Aruba algun dianan pasa door di e tristo noticia di su yiu y a duna su declaracion den e caso aki den cual el a expresa cu den e circunstancianan con e ta mira e caso di su yiu e ta sinti inconforme den e forma con autoridadnan ta manehando esaki, “den e potretnan cu tin, unda mi a mira den e forma con el a keda, e evidencia ta cu e no a mata su mes, el a keda cu su mannan mara den un porta apoya cu su pianan, raspadura den su elleboognan, golpinan den su curpa, huñanan ranca y cu poco paña bisti , con e ta bay kita su mesun bida?”.

Dianan prome di su morto Elida a yega di conta na su tata cu e tabatin proyectonan pa bay Colombia na december y bishita su wela den e dianan di Pasco.

E ta pidi na personanan encarga pa por fabor haci e autopsia na su yiu pa kita nan e zozobra, “e incertidumbre cu nos tin ta hopi grandi pasobra e tabatin un plan di bida cu ta imposibel pa e mata su mes”, el a bisa.

Nan lo sigui insisti pa haya e autopsia, pa asina nan por crem’e y dun’e su ultimo despedida cu segun nan a informa lo tuma luga dialuna di otro siman.