Un di e mayornan perhudica den e caso di e biahenan di scol na Colegio Arubano ta un colaborador di Bon Dia Aruba. El a conta redaccion cu el a paga, mescos cu e otro mayornan di e klasnan cu lo a bay cu e ‘studiereis’ e aña aki, un suma di Afl. 900.
Mester a cumpli cabalmente cu e deadlinenan pa e pago pasobra e scol tabata hopi estricto cu esaki. Sin embargo, pa via di e crisis di Covid-19 e biahe no a sigui, y pa varios luna caba e mayornan individualmente, pero tambe a traves di e oudercommissie OCCA, ta reclama nan placa. Sigur den tempo di e crisis aki, casi mil florin pa cada famia ta hopi placa. Na tur, segun e mayor aki, ta papia di Afl. 160.000 cu a recauda a traves di e contribucionnan y un rifa cu e alumnonan a yuda bende.
Segun e mayor aki, Colegio Arubano tin pensa di keda cu e placa pa un proximo biahe, pero den caso di su yiu e ta bay VWO6 y no lo bay mas cu studiereis pasobra e lo ta den examenklas, ademas cu no ta parce algo cu e scol por dicidi unilateralmente ariba, sin sikiera consulta e mayornan. Curioso di e caso aki ta cu parti di e conflicto entre e rector cu a tuma su retiro y e directiva di SVOA/SMOA tabata cu a reclama e rector pakico e pago na e mayornan no a tuma lugar ainda y a indica e rector como responsable pa e tardanza. Esaki a causa un carta di reaccion di parti di e ex-rector unda el a distancia su mes for di e opinion aki, y a acusa directiva di SVOA/SMOA di calumnia y difamacion encuanto esaki, tocante cual Bon Dia Aruba a publica dia 17 di juni pasa. Den su carta e rector ta argumenta cu nunca e tabata autorisa pa firma pa transaccion financiero pa e scol pues con e por ta responsable pa no transferi e placa pa e mayornan. Tambe el a presenta hunto cu si carta prueba di corespondencia interno cu ta mustra cu ta directiva a pospone, y no cancela e studiereis, y por lo tanto a retene e reembolso di e placa na e mayornan.
