ORANJESTAD – Dia 26 di juli 2014 den oranan di marduga, a sucede un accidente fatal entre dos auto na haltura di Pos Chikito, y un hoben di 24 aña a muri. Su nomber tabata Bruce C. Arends.

Bruce tabata na e momento ey pasando varios dia na Aruba, pa motibo cu e tabata biba na Hulanda. El a sali cu un par di amigo, y ora e tabata bolbe cas, el a topa cu otro auto cu un muhe tabata stuur y el a perde e control di auto, motibo pa cual a causa un accidente, cual a resulta den fayecimento di e hoben na e luga mes.

Bon Dia Aruba a haci un entrevista cu su mayornan, kendenan ta Vianca Arends y Dennis Arends, y nan a splica cu cuater aña y mei pasa, ora nan yiu a perde su bida pa via di accidente ey, e reporte di departamento di Polis a ser manipula, y loke nan ta pidi pa e Ministerio di Husticia ta pa e caso wordo habri bek y e investigacion reanuda, pa e persona cu a causa e accidente por haya su castigo.

Sr. y Sra. Arends a manifesta cu e muhe cu tabata coriendo su auto tabata bou e efecto di alcohol, y pa via di e ora laat di marduga casi mainta, y e cansancio cu e tabatin, el a haya soño y a perde e control di e auto. Pero te ainda –segun nan a expresa– nan ta wardando pa un investigacion mas husto, pa motibo cu manera nan mes a bisa, ‘e mucha muhe ey ta conoci pa algun funcionario cu a traha e reporte di e accidente, y nan ta tapando su nomber pa e no paga su castigo’.

Sr. y Sra. Arends tambe a comenta cu den e caso aki ta existi ‘abuso di poder’, pa motibo cu funcionario di trafico, departamento di polis y un fiscal di ministerio publico cu tabata traha den e caso, mester busca kico a pasa, ‘pero nan a bira man y a manipula e reporte’, sra. Arends a bisa.

Loke nan ta bisa di e reporte di accidente ta cu ni un di e fechanan ta cuadra manera mester ta. E caso aki, cu a pasa dia 26 di juli 2014, casi un luna despues un funcionario a bay haci interogacion na hospital di e muhe cu tabata core e otro auto. Manera sra. Arends a comunica: “Niun caminda e mucha muhe ta menciona algo di e accidente, e ta corda despues di impacto, e no ta papia absolutamente nada di e accidente.” Ademas di esey, tambe el a sigura cu tampoco a firma su declaracion.

Sra. Arends a referi tambe cu den e reporte ta skirbi cu ‘no tabatin consumo di alcohol’, pero e autoridadnan no a haci test di alcohol ni pa e hoben Bruce ni pa e muhe cu tambe ta envolvi den accidente. “Nan tin e prueba cu si tabatin evidencia di alcohol, pero nan a skirbi den e reporte cu no, y esey no ta cuadra” sra. Arends a splica.

Loke e mayornan di e hoben Bruce C. Arends ta pidiendo, ta cu e investigacion wordo haci di nobo, pa motibo cu sra. Vianca a expresa: “Mi yiu no tin un reporte, e reporte cu nan a haci no ta sirbi.” Di mesun manera, el a afirma cu e funcionario di trafico ‘a haci un relato chikito y cu e auto di e muhe tabatin total loss mas tanto dilanti, pero e potretnan ta refleha cu e golpi ta di banda drechi y banda robes di e auto’.

“Mi yiu no tin un reporte di su accidente, ademas di esey nan a skirbi cu mi yiu a perde control, ni un hende por purba esey pa motibo cu un hende mester wak esey, y nan no tin ni un testigo”, sra. Arends a manifesta.

Arends a aclara cu e tin speransa cu Ministerio di Husticia lo habri e caso bek, pa via cu siman pasa el a haya oportunidad di hiba un carta di abogado cerca minister di Husticia, Andin Bikker, pa pidi pa nan revisa e caso aki, y nan ta wardando un contesta.

Tocante e reporte cu autoridadnan a haci, Arends a sigura cu nan tin añanan di experiencia riba accidente di trafico. “Nan tin un 90% di idea di kico ta pasa den un accidente, anto nan ta bin bisa mi cu mi mester bin prueba kico a pasa. Nan no a purba loke nan a investiga, te e dia di awe ni un di nan a bin sinta cu nos como mayornan di e persona cu a perde su bida den accidente ey, pa splica nos kico a pasa.”

Tambe Arends a splica cu autoridadnan a cera e caso dia 29 di september 2014, y nan a haci entrega di e caso pa Ministerio Publico dia 5 di maart di 2015.

Pa finalisa, e mayornan di Bruce C. Arends ta pidi autoridadnan revisa tur e pruebanan cu nan tin y manda pa Hulanda, cu tin hende experto den e casonan asina, pa por construi e caso y haci e reporte, manera kico a pasa; y pa e persona causante di accidente para responsabel pa loke el a haci.