Un grupo di trahado di Parke Arikok a tene un walk out awe mainta pa mustra nan sosten pe director Emil Ter Horst. Esaki a tuma luga prome e caso den corte di e directiva di e parke pa termina su contracto di trabou. Veredicto ta planea riba 1 di maart.
Despues di merdia un otro caso a tuma luga di e director mes contra e directiva y specificamente pa pidi e retiro di e presidente, Greg Peterson. E mesun hues di mainta tabata presente y esaki a haci cu e abogado di e director a entrega un peticion pa ‘wraking’, esta el a pidi pa un otro hues trata e caso. Awor mester warda riba e conclusion di corte prome cu por sigui cu e tratamento di e caso.
Bon Dia a pidi comentario di diferente partido:
Abogado David Wever representando e directiva, ta comenta cu tabatin diferente incidente a base di locual e directiva a conclui cu director Ter Horst no tin e capacidad pa haci un bon trabou. Entre otro e no a mantene su mes na e reglanan y maneho cu directiva a stipula. Esaki a conduci na un situacion cu directiva no tin confiansa mas den e director. Wever ta dementi cu e directiva di e parke tur ora tin conflicto cu su directornan, esta a manda 4 director cas den e ultimo 4 aña. E ta splica cu parke a yega na un areglo di pensioen cu director Ambrioso Curiel y esey tabata bou di un otro directiva. Roy Maduro tabata director interino cu a prepara e solicitacion pa haya un director nobo y e penultimo director Diego Marquez mes a dicidi di bay pa motibo di salud.
Pero Bon Dia tin otro informacion cu entre directiva y e ultimo 4 director (Ter Horst, Marquez y e directornan suplente Maduro y Zaandam) problemanan similar tabata reina.
A base di informacion di e abogado di e director, esta Jeannot de Cuba, por mira cu principalmente e conflicto ta entre e presidente Peterson y director Ter Horst. Es decir cu e presidente no ta tolera e ‘actitud imparcial y independiente di e director’ mustrando riba cierto iregularidad den parke cu ta rekeri solucion. Pesey e director a cuminsa un otro caso unda e kier mustra cu e directiva no ta mantene su mes na ley ni su statuut pa caba cu cierto iregularidad sea pe bienestar di e parke. Mas detaya riba esaki e director no kier duna pa motibo cu e caso no ta trata ainda dilanti hues. Ter Horst si kier comenta riba e prome caso awe mainta: “E ta mustra scur pa mi pasobra nan ta para riba e parti cu nan no tin confiansa mas den mi. Anto ami kier sigui traha y mi tambe ta kere nos por traha cu otro ainda. Pasobra dicon nos a caba di logra hunto e areglo di pensioen “. E areglo aki tabata algo cu ya di 2012 tabata pendiente y ora Ter Horst a asumi su posicion na 2014, esaki tabata un di e puntonan cu e kier a soluciona lihe.
Trahado
Mayoria di e personal di Arikok (40 di e 45 total) a mustra nan sosten pe director actual. Nan a manda diferente carta y awe a sali un atrobe indicando cu te ainda nan no a ricibi niun contesta di directiva. Onderopzichter Hipolito Geerman, trahando 18 aña na parke (pues hasta prome cu e parke a ricibi su status oficial na 2000), a bin cort hunto cu otro coleganan. “Tur aña director ta bin y bay pero anos ta keda trahando eyden. Nos ta mira si cu e director aki ta traha y 94 pa 95% di nos ta tras di dje. Nos no sa kico exactamente ta pasando, pero ami personalmente ta kere ta mastanto un conflicto cu un persona den e directiva, e presidente.” Bon Dia ta puntra si directiva a yega di sinta cu e trahadonan. “No. Tin hende cu ta traha 12 aña aki y no sa ken ta den e bestuur. Anos ta esun cu sa kico ta come y bebe den parke pero nunca nan a tene reunion cu nos.”
Den e carta cu awe a sali pa directiva, e trahadonan tambe ta critica cu directiva no ta tuma tempo pa sinta sea comunica cu nan riba e situacion aki. “Lastima pero nos tin cu informa directiva cu e situacion aki a crea un desconfiansa enorme bou di trahadonan pa cu directiva di Parke Nacional di Arikok.” Nan ta pidi tambe pa reconsidera e posicion di retira e director.
