Mayoria prizon no tin variedad di cuminda mes grandi cu na Aruba

Director di KIA, sr. Rocco Tjon ta bisa Bon Dia Aruba cu ultimamente tin hopi keho cu a sali den media tocante e cuminda cu ta duna e presonan na KIA. Sr. Rocco ta enfatisa cu e instituto ta cumpli cu tur rekisito di nutricion necesario pa cada persona y cu organisacionnan internacional ta elogia esaki.

“Regularmente tin organisacionnan di afo cu ta bin haci inspeccion na KIA. Mayoria prizon na Merca mes no tin e variedad grandi di diferente categoria di cuminda pa ofrece cu presonan por kies for di dje, ” sr. Tjon ta splica. Na mayoria prizon bo ta come locual bo haya anto esaki no ta e caso na Aruba segun sr. Tjon.

Comentario di dokter
Ernesto Rodriguez, un di e dokternan na KIA y specialista den “Immunology” ta splica Bon Dia Aruba cu na comienso no tabata tin un bon structura pa locual ta e parti di nutricion na KIA. “Ora cu bo tin un detenido cu tin un problema medico specifico, nan no por come kico cu ta. Pues diferente malesanan ta rekeri diferente dietanan,” Dr. Rodriguez ta bisa. Den 2011 ainda no tabata tin un bon maneho di e cuminda pasobra tabata rekeri pa traha diferente tipo di cuminda pa por pas na e dieta di e detenido. Na 2013 Dr. Rodriguez a cuminsa haci un plan pa structura y traha un programa nobo.

Diferente categoria
KIA tin seis diferente categoria di cuminda, cual prome tabata hopi mas. Dr. Rodriguez ta sigui bisa: “Na final di dia mi mester a crea un lista chikito cu diferente categoria. Mi a crea un categoria specificamente cu ta basico, tin uno pa pashentnan diabetico, cu presion of problema di stoma.” Dr. Rodriguez a reuni cu tur e companianan di cuminda pa elabora riba esaki anto yega na un acuerdo. E ta dificil pa un compania di cuminda traha diferente tipo di dieta pues e structura nobo aki tabata na su luga. Tur e dietanan ta bon balansa: sin specerij, sin vet pero compaña cu lamunchi of algo otro por ehempel pa e smaak. Tin categoria tambe pa pashentnan cu ta vegetario y pa pashentnan cu mester haya fibra.

No tin cushina na KIA
Sr. Rocco Tjon ta splica Bon Dia Aruba cu KIA tin un contract cu un compania di cuminda anto cada pasa tanto tempo e contract ey ta wordo renoba of ta busca un otro compania. “Nos no tin un luga pa traha cuminda akinan na KIA. Na final di dia esaki lo por ta ideal pasobra bo tin forsa laboral cu bo por uza di e mesun detenidonan pa haci e. Y tambe bo por haya cosnan mas fresco. Pasobra ora cu bo mester transporta berdura por ehempel, e friu cu e cayente no ta bay cu otro y por crea problema di salud,” Dr. Rodriguez ta splica. E bon ta cu e compania cu ta traha cu KIA en cuanto cuminda ta cu te ainda no a haya ningun problema cu esaki unda cu por a haci un detenido malo of alergia segun Dr. Rodriguez.

Motibo pakico presonan ta keha
Locual ta pasa ta cu ora bo ta un detenido, bo ta wak e via e punto di bista cu despues di un rato bo ta fada di e mesun presentacion of un por ehempel un dia cu e galiña of carni no ta wordo cushina bon. “Ora bo tinun compania bo kier pa esaki draai bon y tin biaha bo ta haya cu bo tin e recurso humano cu porta e momento ey no ta cumpli cu e rekisito cu bo ta pidi pa traha. Pues tin biaha e bakinan ta bini un tiki mas delega of tin biaha e cantidad cu nan ta rekeri no ta suficiente,” Dr. Rodriguez ta splica. Segun Dr. Rodriguez, semper un hende ta bay keha den un manera of otro pa algo anto si bo ta cera na KIA pa tanto aña, bo lo kier wak un variedad enbes di por ehempel sa tur dialuna kico bo ta bay come. “E ta bon cu akinan mi tin e detenidonan riba dietanan estricto unda cu por controla con nan ta come y tin un control di metabolismo di e pashent cu ta hopi efectivo. E ta atrobe na kico bo gusta, kico bo kier y kico bo kier keha riba dje. Ora cu e compania ta baha e vigilancia pa cu e calidad di e cuminda, nos ta bolbe bay cerca nan y nan ta tene esaki na cuenta. Pero no ta manera ta algo cu ta pasa constantemente.”

Den fin di siman, sr. Reginald Danies – conoci como e mayor cu ta bringando pa cambia ley di abuso di mucha na Aruba – a haci algun comentario riba Canal 22 tocante e cuminda na KIA. Algun aña pasa el a sinta castigo na KIA y ta bisa cu: “Nan ta haya cuminda pisa pa gram. Pueblo ta paga 22 pa 25 florin pa un cuminda pa preso. Pero e cuminda ey ta cuminda cu ta bal menos cu 10 florin. E ta pisa pa gram, preso ta come anto keda cu hamber. Cos cu no tabata tin antes paso un preso ta paga pa un castigo y no dos.”

Gasto medico
Pa conclui, sr. Rocco Tjon ta bisa cu tur gasto medico ta cay direct pa Land Aruba. E ta bisa: “P’esey tambe nos ta echt stress riba e parti di nutricion. Pasobra esey ta un parti unda bo ta wanta bo gastonan medico abou.” E ta un forma preventivo cual ta yuda baha gastonan unda por ehempel tin reduccionnan grandi di pashent cu insulina y pildonan.