Pa loke ta 2016 te cu aworaki hospital a ricibi 75 keho cu a drenta oficial, Thairine Becker kende ta e persona pa intermedia den asunto di keho di Hospital a bisa. Ta busca pa pashentnan haya contesta di locual cu a pasa cu nan no ta di acuerdo cun’e.
Banda di e cantidad di 75 keho, tin algun mas cu lo subi e total pa 80 cu Sra. Becker ta categorisa como “casi keho”, cual ta hendenan cu a presenta pa duna keho pero despues cu a papia cu nan, nan ta bay bek na e departamento y ta logra resolve e situacion sin cu nan ta entrega keho. For di e 75 kehonan oficial 1 tin cu ta habri (pendiente) ainda y tur e otronan a wordo atendi.
Pa loke ta e kehonan hopi ta riba “behandeling en zorg” cuido, y e di dos su tras ta comunicacion cual por wordo reparti pa falta di informacion y tambe con dos hende a comunica cu otro (“Mi no a gusta con el a trata mi”). Hopi biaha den cuido e keho categorisa como cuido, comunicacion tambe ta hunga un rol grandi segun Sra. Becker. Esaki ta pasobra un persona ta expresa di no ta contento pa con nan a wordo trata, pero ora cu puntra nan si nan a puntra tocante esaki, nan ta contesta cu nan tampoco a puntra.
Pasonan ora ta atende cu un keho
“Ora cu un persona bin pa keha e por bay diferente manera. Tin ta cuminsa cu yama mi via telefon, unda cu nan ta puntra si nan ta na e departamento corecto etc. E ora mi ta bisa nan cu si nan kier entrega un keho y nan kier pa mi traha riba esaki, e mester ta skirbi sea na man y entrega na balie of ta pone den un e-mail.” Segun Sra. Becker esaki ta importante pasobra e mester por mand’e pa e persona cu bo a keha. “Ora mi yega mainta mi ta pasa na balie y wak si tin keho eynan, generalmente e persona ta laga un number di telefon cu e-mail atras, pues mi ta tuma contacto cun’e pa confirma cu mi a ricibi e keho. Mi ta haci esaki pasobra mi sa cu hopi hende tin e percepcion cu nan ta entrega e keho pero nan ta tire afo.” El a sigui splica cu unabes e lesa e keho y e ripara cu e ta algo cu por wordo atende lihe cun’e, ta haci un cita pa nan por pasa y trata esaki. Si ta ripara cu e ta algo cu ta bay tarda ta haci un cita cu e persona pa nan ricibi un feedback. Por ta cu e ora no tin un contesta final ainda, pero ta informa e persona cu a entrega e keho den ki fase e ta y ki dia ta tuma contacto atrobe. “Ta despues di e fase aki, e keho ta bay na e persona of personanan cu el a entrega keho contra. Kiermen si el a keha un departamento, e keho ta bay na e hefe di e piso.”
Banda di esaki Sra. Becker a splica cu e ta puntra e persona cu entrega e keho semper kico ta su deseo cu e keho entrega. Hopi biaha nan ta pone tur nan emocion den e carta y e por contene varios keho den uno, pues ta determina kico nan kier resolve specificamente. E ora ta wak si nan mes kier presenta, si nan kier pa Sra. Becker mes haya e contestanan, of si nan kier papia directamente cu e persona cu nan ta keha entre otro. Cual ta unda Sra. Becker ta intermedia pa nan. “Mi a sinta den un combersacion 1ora y mey entre un dokter cu un pashent, como cu e pashent tabatin yen pregunta, cu ami no por a conteste cual ta e dokter so por dun’e. Pues a comunica e deseo di e pashent cu e dokter cu tabata habri pa esaki di biaha, a haci cita y nan dos por a papia cu otro.”
Empleado mester atende pashent cu duna keho
Un empleado por nenga semper di papia cu un pashent cu a entrega keho contra di dje. Pero den e area di trabou segun Sra. Becker, bo mester bin dilanti cu contesta y para responsabel pa bo hecho nan. Te ainda niun hende a nenga pa haci esaki y ta kere cu e tin di haber cu cada empleado ta wordo entrena pa esaki. “Nos ta haya charla tocante esaki y ta bisa e proceso di e trabou cu ta encera cu si nan keha bo mester skirbi un relato y si e hende sinembargo kier papia cu bo, bo mester atende.”
Empleado cu diferente keho
Sra. Becker ta tira bista riba cantidad di keho of keho structural entrega contra un empleado. Hopi biaha e keho ta bay dirigi na un persona specifico y nan ta pone su nomber. Si tuma nota cu tin varios keho entrega contra e persona door di diferente persona, Sra. Becker ta manda e kehonan claro pa e hefe di e departamento pero tambe ta manda un nota indicando si a ripara cu tin hopi keho contra e persona ey specificamente.
E hefe tin su proceduranan cu e ta sigui contra e empleado e ora. “Pa aña bo tin dos encuentro pa wak con bo ta funcionando den bo trabou, pero si tin keho cu a cay net memey di e dos encuentronan aki, depende kico e ta bo por wordo yama aden y eynan bo ta haya sa kico e consecuencia ta. Tambe si ta cosnan cu mester drecha, nan ta palabra cu bo pa drecha esaki y nan ta palabra un otro fecha pa wak con ta bayendo. Pues no ta asina cu nada ta pasa cu e empleado, e tin consecuencia.”
Si ta un pashent cu constantemente ta keha e mesun empleado ta papia semper cu tur dos pa mira kico ta e problema unda cu semper ta haya cu cada partido ta admiti nan foutnan. Esaki no ta haci cu e keho ta kita, pero cu nan ta para responsabel pa loke cu nan no a haci bon.
Finalmente Sra. Becker a bisa cu e sistema di entregamento di keho cu tin na hospital no ta algo nobo, e ta algo cu t’ey ya pa 15 aña. E unico cambio cu tin, ta cu awo tin un persona eynan full time cual antes no ta asina. Esaki a wordo cambia netamente pa mehora servicio di hospital.
Reaccion cu ta haya for di pashentnan ta cu nan ta satisfecho cu e servicio di con ta atende cu nan keho, pasobra anteriormente nan tabatin impresion cu nada ta wordo haci cu e keho entrega. Awo nan ta contento caba for di momento cu nan haya yamada di confirmacion cu a ricibi nan keho. “Pa hopi mi no por cambia locual cu a pasa, pero mi por percura pa nan haya un contesta y un splicacion pakico algo a bay di tal forma. ”
