ORANJESTAD – Kirsten Arndt miho conoci como ”Kiki” di Fundacion Cas Animal, ta splica Bon Dia Aruba cu simplemente e hecho ta cu na Aruba mayoria hende no ta worry of no ta duna suficiente atencion na cuido di bestia y p’esey e situacion ta keda uno fastioso.
April 2017 Fundacion Cas Animal ta bay haci 8 aña existente yudando bestianan na Aruba cu e unico Animal Ambulance cu tin riba e isla. Kiki ta splica Bon Dia Aruba cu simplemente e hecho na Aruba ta cu mayoria hende no ta presta suficiente atencion na e cuido di bestia y tur otro cos ta sigui empeora despues di esey.
”Pa mayoria hende mi ta ripara, bestia y naturalesa no tin ningun balor. Nan no ta worry si e cachonan of pushinan wordo vacuna regularmente. Ora cu nan ta move na un cas nobo y e bestia ta malo, nan ta laga e bestianan atras pasobra e ta facil pa busca puppies.” Pa temporada di Pasco, puppies nan ta hopi tutu y pa luna di februari, nan ta tira nan riba caya segun Kiki ta splica. Su persona a ripara cu poco poco, ta parce cu e balor pa nos bestianan riba e isla ta keda bay atras.
Ta trata bestia manera articulo material
Segun Kiki, un cos cu e por a ripara ta cu mayoria hende ta trata nan bestianan manera cu nan ta un tipo di articulo material cu bo ta cumpra awe y tira afo mañan. ”Basicamente, si hende por cuminsa worry un tiki mas y realisa den hopi caso cu nan ta tratando cu un ser bibo y no djis un cos material, tur cos por cuminsa bay poco mas miho y no lo tin hopi problema mas.” E ta splica Bon Dia Aruba, ta importante pa bo cuida bo bestia y cumpli cu tur locual ta rekeri sin cu mester culpa e bestia. Ta abo mester percura pa bo spuit bo cura pa carpata, percura pa e tin su vacuna y bishita regular na veterinario. ”Abo tin cu haci e cosnan aki pa nan, nan no por haci e riba nan mes!”
Cacho esun cu mas problema
”Bo por trata un cacho hopi malo y ainda nan lo stima bo, ainda nan lo bini cerca bo.” Kiki ta splica cu den su opinion, cachonan ta esunnan cu ta pasa mas trabao na Aruba pasobra nan ta depende mas riba hende. Pushinan al contrario no ta pega mesun hopi na hende cu nan por pega por ehempel na un luga, un area of un cas. ”Nos tin hopi raton, lagadishi cu e pushinan ta consumi cu nan por haya suficiente likido den e cuminda cu nan mes ta gara. Nan tambe mester di awa pero nan no mesun hopi cu un cacho,” e ta splica, agregando cu nan organisacion tin hopi obstaculo den yuda cu varios di e problemanan aki pa hopi aña.
Ley di Cacho ta un ‘desaster’
”Aunke cu ami of cualkier organisacion kier yuda un cacho, pushi, cabrito of cualkier otro bestia cu mester ayudo, nos no mag. Si nos mester gara un bestia pa purba di yuda nan y trata nan, trece nan veterinario, e ta considera ladronicia.”
Fundacion Cas Animal a purba di yuda pusha pa e ‘Ley di Cacho’ bira un ley di berdad pa protege tur bestia anto esaki no a logra. ”Ley di Cacho ta un desaster. E ta traha pa facilita e captura di cacho riba caya y nada mas. E ley aki, enbes di protege e bestianan, e ta facilita e proceso di garanan y matanan.” Kiki ta splica cu e ley aki mester wordo reemplasa pa uno cu realmente ta yuda captura y protege e bestianan. ”Enbes di scucha for di un solo caminda, nan mester tuma consideracion di esunnan cu tin experiencia cu leynan di proteccion pa bestia. Pakico no pidi apoyo di Hulanda of algun di e organisacionnan grandi na Merca pa puntra nan ki experiencia nan tin cu leynan di bestia cu si ta funciona.”
Actitud mester cambia
Finalmente Kiki ta bisa Bon Dia Aruba cu e actitud mester cuminsa cambia en cuanto ta e perspectiva di con nos ta trata cu tur tipo di bestia. Esaki mester cuminsa for di un edad hopi jong pa e sigui di generacion pa generacion. ”Un tempo mi a duna un charla y demostracion na con pa trata cu puppies na un scol anto un mucha a acerca mi y bisa mi cu su mama ta siñ’e cu ora cu un puppy no ta comporta, pa e gara un palo anto pa e dal’e. E tipo di cosnan aki ta kita mi motivacion.”
Kiki ta menciona e programa di sterilisacion cu actualmente ta den su procedura pa cuminsa inicia. Cual ta hopi positivo como tambe ta haci un apelacion na otro hotelnan y hendenan pa bin hunto pa esaki bira mas grandi. Sin laga afo, Kiki ta menciona cu a yega ora tambe pa bestianan di cunucu tin nan debido proteccion. Pa nan no djis wordo trata manera un pida cos cu no tin balor y no tin bida.
