Conseho Consultativo no tin informacion adecua
Despues di e tratamento di e ley encuanto e refineria, ta warda nos otro debate cayente. Esey ta trata e presupuesto 2017 cu tin su complicacionnan. Esey no ta concerni solamente e cifranan general, pero tambe e discusion tocante por ehemplo e definicion di e ‘sector colectivo’. Den su comentario riba presupuesto 2017 Conseho Consultativo (Raad van Advies, RvA) a entabla e debate aki, entre otro tratando di yega na un panorama di estado financiero di e diferente entidadnan cu ta liga na gobernacion. Den esaki tin dos forma. Uno ta e entidadnan cu ta forma parti di e sector colectivo, pa cual prome cu 1 di april di cada aña mester dicidi cual ta e entidadnan cu pa e siguiente aña ta considera perteneciente na e sector colectivo y cu mester duna nan informacion.
Interesante ta cu den varios caso hasta e organo importante aki no ta logra haya e informacion financiero di varios di nan. No ta bisa cu tanto palabra cu nan ta nenga di duna nan informacion den tur caso, pero den esun di Aruba Tourism Authority e conseho ta bisa cu ni di e entidad, ni di e ministro concerni, a pesar di repetido peticion, nan no a logra haya ningun cooperacion. Den un caso asina e pregunta ta naturalmente ken mester actua? RvA no por actua, nan ta solamente señala e problema di falta di cooperacion. Esun cu mester actua ta gobierno y mas specificamente e ministro cu tin e entidad na su encargo. Esey ta trece nos den e situacion cu por sea bira masha comico, o masha grave mes. Contal cu e ministro mester actua disciplinariamente contra su subalterno, e director di ATA, cu ta fayando den su trabao pasobra e no kier o no por produci e informacion desea.
Ironico ta cu e ministro mes, cu tabata e arkitecto di e ley di ATA, a percura pa e tin e posibilidad extra di duna instruccion directo na e director, sin mester bay via e conseho di supervision. Y si e director no cumpli, e tin problema grave. Naturalmente cu ora bo ta skirbi ley, e texto ey no ta tene cuenta cu abo ta laga skirbi esey pa tempo bon, pero pa tempo malo. Y si pa mala suerte bo tin un amigo of amiga sinta eynan, esey pa e ley no ta haci diferencia! Y pakico nos ta trece esaki dilanti? Pasobra ora cu RvA ta señala e asuntonan aki, cu ta falta gravisimo di respet pa un organo di prestigio, nos no ta mira nada ta move, mayoria di hende no ta ni haya e cosnan aki pa lesa, te pa nan tin un opinion riba e asuntonan aki. Pero ta e cinismo increibel cu cual e sorto di cosnan aki ta ser practica cu ta mina tur confiansa cu por tin cu algun dia nos ta yega na un estado di derecho, cu colaboracion di y no a pesar di gobernacion.
Pero e problema no ta solamente cu e entidadnan aki cu ta cay bao autoridad di un ministro cu ta creando su mes paraiso dentro di Aruba y no tin cune’s cu nada. E cuadro cu RvA a traha di e asunto aki ta mustra cu tin hopi trabao pa haci tambe bao di e empresanan estatal. RvA a haci un analisis di con ta para cu cumplimento di e empresanan estatal cu entrega di informacion financiero. Pa loke ta e cifranan di aña 2015, por constata cu ta solamente APA NV, AAA NV, Setar NV y Compania Arubano di Petroleo (CAP NV) a entrega nan resultado. A keda sin cumpli ANSA NV, Freezone Aruba NV, Arubus, Aruparking, Arutram, Elmar, Post Aruba, Utilities y WEB Aruba NV. Nos tin dos tercera parti di aña nos tras caba anto den e pais aki nos ta permiti cu mayoria di empresa estatal no tin cuenta anual di aña pasa? Pero esey no ta tur. Nos tin den e resumen tambe e estado di asunto pa loke ta proyeccion pa aña 2016. Aki ta dos compania a duna un cifra, pero ironicamente ta dos cu ni sikiera a entrega nan cifranan di 2015, cual ta Elmar y WEB. Awor, si bo no por duna bo relato di aña pasa, lo ta interesante pa splica publico ta con bo por sa kico ta bay ta bo beneficio e aña siguiente.
Tur esaki ta motibo pa critica fuerte riba tur e entidadnan aki? Sigur cu si, pero tumando na cuenta cu e problema ta sinta den Bestuurskantoor tambe. Nos tur sa masha bon cu, a pesar cu tin di nan ta trata na hiba un maneho profesional, e presion pa actua a base di orden for di e nivel politico ta hopi fuerte. Esey tambe ta e causa cu practicamente ningun di e entidadnan aki ta publica nan cuenta anual, salvo algun excepcion positivo. No por spera di un gobernacion menos cu mediocre cu nan ta bay pone criterio mas halto pa e empresa y entidadnan liga na gobernacion cu nan mes kier alcansa. Unda nos ta cuminsa drecha?
