Pa loke tin cori di 2017 y ya caba tin pendiente algun referendum cu pronto lo wordo celebra cu intermediacion di oficina di Mediador di Gobierno.
Na e momento aki tin por lo menos tin alrededor di tres peticion di referendum; y algun di nan di FTA a keda publica caba cumpliendo debidamente cu e ley di referendum. Tanten e tramite ta canando pa referendum di apotheker di Botica Eagle. Tambe tin algun otro peticion di referendum haci pa sindicato STA. Mediador di Gobierno, Anselmo Pontilius a declara na Bon Dia Aruba cu nan mester sondea ainda prome con e proceso normal ta cana y si tur cos ta na ordo, nan lo mester publica tocante e celebracion di referendumnan pendiente; pero el a abstene di bisa na unda. Pues den henter januari tin tres peticion pa referendum locual ta un cantidad relativo, ya cu e por ta menos of mas.
CAO
El a laga sa cu na ceramento di 2016 e gran cantidad di contracto colectivo (CAO) di empresanan estatal grandi, un gran mayoria di nan a wordo negosha caba. Esaki lo por ta un sinonimo di paz laboral. Aunke ainda FTA tin un cantidad di CAO pendiente; ya cu nan ta e organisacion sindical cu mas CAO ta negosha na Aruba.
Refineria y sindicato
E aña aki ta keda un gran pregunta riba cual lo ta e rol di e sindicatonan den e refineria, ora cu e trahadonan lo dicidi di organisa nan mes.
Sr. Pontilius ta spera cu dor di bon guia di departamentonan di gobierno e proceso lo por cana bon. Nan mester percura pa duna bon guia na e dunado di trabou cu ta yega emplea e trahadonan pa realisa e trabou di renobacion di e refineria den e periodo di dos aña of mas. Nan berdaderamente mester tin e sabiduria y habilidad pa evita loke a yega di sosode den pasado, caminda caso di abuso contra e trahadonan a yega di tuma luga, violando ley laboral di tur indole.
