Un biaha mas un grupo di Venezolano a reuni ariba Plasa Simon Bolivar pa expresa nan indignacion contra eleccion di un asamblea constituyente diadomingo ultimo. Mayoria di esunnan presente a yega di participa cu nan voto den e consulta popular cu a tuma luga dia 16 di juli pa rechasa, entre otro e eleccion aki cu nan ta tilda di fraude y un forma pa instala un gobierno dictatorial den e pais bisiña di Venezuela.

Mas cu 4 mil Venezolano na Aruba a vota contra di bin cu un constituyente pa reforma e Constitucion na Venezuela. Pa prome biaha un votacion asina halto a yega di tuma luga den e comunidad Venezolano na Aruba. E ultimo eleccion presidencial tabatin menos cu 2 mil Venezolano inscribi den nan censo electoral pa vota den e Consulado di Venezuela na Aruba.

Rechaso
Un vocero di oposicion contra e gobierno Venezolano na Aruba ta Laura Luces kende hunto cu un grupo di Venezolano a expresa nan rechaso contra e eleccion di e constituyente aki. El a laga sa cu e evento aki ta uno na nivel internacional caminda tur Venezolano rond mundo a condena e “regimen di Nicolas Maduro” pa bin cu un constituyente ilegal, sin respeta e boluntad di e mayoria di e pueblo Venezolano. E echo cu eleccion di constituyente a tuma luga toch, esaki no kiermen cu e accion di protesta ta stop. El a sigura cu un 90% di e pueblo di Venezuela ta luchando contra e regimen inhumano aki. Mientras cu ayera, Departamento di Estado di Merca a bin cu mas sancion contra e gobierno di Venezuela. E biaha aki nan a inclui Nicolas Maduro den e lista ‘Clinton’ conoci oficialmente como “Specially Designated Narcotics Traffickers o SDNT list”. E ta e lista preto di empresanan y personanan señala di tin relacion cu placa producto di narcotrafico.

El a laga sa cu e constituyente ta un invento di Nicolas Maduro cu a yega laat. E tabata un forma pa bin cu un negociacion pa stop e protesta cayehero. Pero prome cu el a propone e constituyente, e pueblo Venezolano tabata sufri hamber caba y no tin remedi.

E grupo di Venezolanonan cu mester bandona nan pais pa e crisis interno cu Venezuela ta pasando aden y e situacion inhumano di falta di alimento y remedi, ta grandi. E expresion di rechaso contra constituyente a wordo sinti dor di e comunidad Venezolano bibando den exterior den casi cada ciudad di mundo na Europa, Norte America, Latino America, Islanan di Caribe, Asia y Africa. E ta un condena contra e fraude di bin cu un constituyente cu e regimen di Nicolas Maduro kier impone pa medio di forsa na e Venezolano, el a laga sa.

E temor di un confrontacion y dramamento di sanger a wordo expresa diadomingo ultimo. El a declara cu e opresion ta uno pisa, caminda mas Venezolano a muri victima di e violencia orkesta pa e gobierno Chavista. Durante e oranan di e eleccion aki a reporta 9 morto y mas a wordo reporta despues. “E opresion ta uno brutal. Nan a bira loco. Nan ta rabia pasobra e participacion tabata basta pober”, el a bisa. Na Merida a wordo informa e yegada di avion Hercules cu cantidad di militarnan pa oprimi e pueblo aki.

El a agrega cu un 90% di e Venezolanonan tabata sa cu eleccion di e constituyente tabata un fracaso y un evento falso; y nan no ta acepta e fraude aki. Esaki a keda denuncia internacionalmente cu imagennan cu a mustra cu e centronan di votacion tabata bashi. Mientras cu el a condena cu e presidente di Conseho Nacional Electoral (CNE) Tibizay Lucena a bin cu e cifra irealistico cu 90% di e Venezolanonan a bay vota. “Mi no sa di cual Venezolanonan e ta papiando. Por ta e ta papiando di e Cubanonan cu a haya e paspoort di Venezolano.”

Sra. Luces a bisa cu un echo cu mester tene cuenta cu ne y cu e ta felicita ta un gran grupo di empleadonan publico di Venezuela cu a pesar cu nan a wordo menasa di perde nan trabou, nan a dicidi di no bay vota diadomingo ultimo. “Mi ta felicita nan. Pa mi nan ta heroenan!”