Sindicato FTA a logra e mayoria di voto pa representa e trahadonan bancario di CMB. E resultado di ayera ta completa cu FTA a bira e unico sindicato cu ta representa e trahadonan di e sector bancario.
Un total di 197 trahadonan tabatin derecho di vota. E resultado a mustra cu 123 trahado a bay eherce e derecho aki di cual 122 a vota pa FTA y tres no a vota pa niun sindicato. Den e caso aki FTA tabatin mester di 99 voto pa bira e sindicato di e trahadonan CMB y nan a logra 123 voto, pues un diferencia substancial.
E resultado aki ta haci cu FTA ta bay representa e trahadonan di CMB pa negosha un contracto colectivo (CAO) nobo. Na final di e referendum mediador di gobierno, Anselmo Pontilius a recorda tur hende na mesa, tanto e representantenan sindical como esun di e banco, cu e trahadonan a haci uzo di nan derecho. Pero e echo cu e trahadonan ta haya representacion di un sindicato, esaki no kiermen cu nan por haci loke nan kier. “Tur empresa tin regla y bo ta biba cu nan”, el a declara na Bon Dia.
For di 2or di atardi, ora cu e referendum a pidi pa sindicato FTA cuminsa den sede di mediador di gobierno, un gran cantidad di trahadonan di CMB a bay haci uzo di nan derecho di vota. Pa 7or di anochi e referendum a cera, y despues a bini e proceso di contamento di voto cu a determina FTA a logra e mayoria di votonan pa representa e trahadonan di e banco aki.
Presidente di FTA, Hubert Dirksz a bisa na Bon Dia Aruba cu nan tabata hopi positivo mirando e cantidad di trahadonan cu a bay vota. E siman aki e lider sindical a curasha e trahadonan di CMB pa bay vota. E ta considera e resultado y participacion di e trahadonan cu a bay vota como algo historico. “Mi ta felicita tur trahadonan cu a bay vota.”
