Dr. Horacio Oduber Hospital a realisa un estudio di comorbilidad (morbilidad relaciona cu diferente enfermedadnan) den pashentnan di COVID-19 na Aruba durante e di cuater ola, periodo entre 1 du juli 2021 y 1 di october 2021, di e pandemia di coronavirus. E categorianan di comorbilidad examina tabata cancer, hipertension, enfermedad cronico di riñon, COPD, diabetes y enfermedad di curason.

E estudio realisa ta demostra cu dentro di e pashentnan di COVID-19 cu a wordo investiga den e momento di e cuater ola na Aruba tin, manera durante e tercer ola, hopi comorbilidad. Mas di 85% di e pashentnan tabatin un of mas comorbilidad (otro enfermedadnan). E comorbilidadnan mas comun ta sobrepeso (obesidad), hipertension y diabetes. Mas di 90% di e pashentnan tabatin sobrepeso, for di pre-obeso te cu obeso morbido.

Di e pashentnan ingresa na hospital, 25% tabata vacuna, y solamente un par cada biaha. E otro 75% no tabata vacuna. E number di comorbilidad pa pashent tabata un poco mas halto entre pashentnan cu tabata vacuna cu esunnan cu no tabata vacuna. E estudio a mustra cu 58% di e pashentnan vacuna tabatin un of mas comorbilidad. Pa loke ta e pashentnan cu no tabata vacuna e porcentahe tabata casi 46%.

E comorbilidad tabata mas grandi entre e pashentnan cu a fayece pa motibo di COVID-19. Solamente 5.4% di e pashentnan cu a fayece pa motibo di COVID-19 no tabatin comorbilidad. E 66% di e casonan tabata involucra un of mas comorbilidad.

E capacidad di e Unidad di Cuido Intensivo (ICU) na hospital na momento di e di cuater ola tabata insuficiente, principalmente pa motibo di falta di “mannan na cama”. Consecuentemente 39 pashent a wordo intuba y manda pa Colombia. 13 pashent a fayece na Colombia y 10 a recupera y ta di buelta back na Aruba. Hospital ta describi e ayudo na Colombia manera “esencial”.

E estudio ta afirma cu obesidad den particular ta e factor di riesgo mas fuerte den e ingreso di pashentnan cu COVID-19 na hospital. Ademas di e formacion y di nombra financieramente factibel mas personal di cuido, un enfoke mas grandi ariba prevencion ta necesario pa reduci e impuesto ariba e capacidad di, y e empleadonan den HOH manera unico hospital na Aruba.

E poblacion di pashentnan investiga ta inclui 327 ingreso pa motibo di COVID-19. E 327 ingresonan aki ta involucra 314 pashent unico; 301 pashent a wordo ingresa un biaha na HOH pa motibo di COVID-19 durante e periodo di investigacion, y 13 pashent, durante e periodo di investigacion a wordo ingresa dos biaha pa motibo di COVID-19. Di e 314 pashentnan unico 300 tabata residente di Aruba y 14 tabata turista.

Un total di 56 pashent a fayece durante nan ingreso durante e periodo di e di cuater ola di e pandemia; 29 muhe y 27 homber. E grupo di edad cu mas fayecido ta e grupo di 60 pa 79 aña di edad, dus 80% di e fayecidonan tabata ariba di 60 aña. Di e 56 pashentnan cu a fayece 43 a fayece na HOH na Aruba y 13 na un hospital Colombiano.

E siguiente tres grafieknan ta mustra e distribucion pa categoria di comorbilidad den tur e pashentnan cu COVID-19 (grafico 2A), den e pashentnan vacuna (grafico 2B) y den e pashentnan no vacuna (grafico 2C). Sobrepeso, sigui pa hipertension y despues diabetes ta esunnan mas comun. Esaki ta aplica tanto pa esunnan vacuna como tambe esnan cu no tabata vacuna, aunke e porcentahe ta den e grupo di e pashentnan cu tabata vacuna, cu excepcion di sobrepeso mas halto den tur e ambitonan (mas comorbilidad) cu den e grupo cu no tabata vacuna.

Den tur e pashentnan cu COVID-19, mas di e 80% tabatin sobrepeso (pre-obeso, obeso of obesidad morbido). Pa e grupo di personanan vacuna e porcentahe aki tabata 72.4%, compara cu 84.2% den e grupo di personanan cu no tabata vacuna.

Den solamente 5.4% di e casonan no tabatin comorbilidad, den 66% di e casonan tabatin un caso di dos of mas comorbilidad. Comparando cu full e grupo di pashentnan cu COVID-19, e porcentahe pa categoria di comorbilidad ta mas halto, esaki ta specialmente pa e categoria di hipertension y enfermedad di curason, y den cierto medidanan diabetes.