Unicamente 13 di 44 compania publico, sector colectivo, fundacion mara na ley, y fondonan di presupuesto a manda nan cuentanan anual di 2019 pa College Aruba Financieel Toezicht, CAft.
CAft kier wak cuentanan anual di diferente compania di Gobierno, incluso entidadnan den e sector colectivo y fondonan di Presupuesto. Esey Presidente di College Aruba Financieel Toezicht, CAft, esta dr. Raymond Gradus ta informa Minister di Finanzas Xiomara Maduro den un carta.
E entidadnan cu a cumpli ta e companianan Triple A, NV, Setar NV, IMSAN, Organo ehecutivo di AZV, Banco Central di Aruba, APFA, SVB y tambe DOW, ademas di e fundacionnan Parke Nacional Aruba, Wit Gele Kruis, Reclassering & Jeugdbescherming, SMOA y SABA. Entre esnan cu no a entrega nan cuenta anual di 2019, ta Raad van Advies, Algemene Rekenkamer, y Parlamento di Aruba.
Segun CAft, articulo 8 di e Landsverordening Aruba financieel toezicht, LAft, e College tin derecho pa haya tur e cuentanan anual di e grupo di organisacionnan menciona. Ta trata di organisacionnan cu ta dirigi pa ley di Aruba, y ta fundacionnan di Gobierno selecta, ademas di e fondonan di Presupuesto Tourism Product Enhancement Fund cu mester entrega cuentanan anual di 2015 te cu 2019; e OnderwijsFonds cu mester entrega cuentanan anual di 2018 y 2019; CriminaliteitsFonds cu mescos cu TPEF mester entrega e cuentanan anual di 2015 te cu 2019; y e Sociaal Crisis Plan cu mester entrega su cuentanan anual pa 2018 y 2019.
Otro entidadnan cu a keda atras cu nan cuenta anual ta APA, Utilities, Arubus, Free Zone Aruba, Post Aruba, Compania Arubano di Petroleo, Refineria di Aruba, Fuels Marketing and Supply Aruba (FMSA), Serlimar, Aruba Tourism Authority, Universidad di Aruba cu a entrega e cuenta anual di 2019, pero a keda falta e cuentanan anual di 2017 y 2018, Volkskredietbank, Fondo Nacional di Garantia pa Vivienda, FCCA, Fundacion Lotto pa Deporte.
E fundacionnan di Gobierno cu no a entrega nan cuenta anual di 2019 ademas di otro añanan ta Stichting Schouwburg Aruba, UNOCA, Casa Cuna, Cede Aruba, SKOA, SPCOA, SEPB, y Stichting Ziekenverpleging Aruba. Algun di e fundacionnan aki mester entrega cuenta anual for di 2015 bin ariba.
CAft ta urgi Gobierno pa pidi pa e cuentanan anual aki, y si nan no ta cla, por entrega e cifranan preliminario.
A base di articulo 22, inciso 2 di LAft, Aruba tabatin te cu 15 di September 2020 pa raporta e gastonan, entrada, deficit y debe di entidadnan den e sector colectivo pa e aña prome, esta 2019. Segun e Ley di Comercio Articulo 73, inciso 1, cuentanan anual di companianan di Gobierno mester ta cla pa mas laat ocho (8) luna despues di ciere di e aña administrativo, alomenos cu e reunion general di accionistanan a extende e periodo.
For di esaki mester resulta si tin surplus mas halto of mas abao, cu ta determina den articulo 14 den e LAft. CAft ta constata cu no a duna e informacion aki ainda y ta pidi pa esaki.
E colegio ta bisa e Minister di Finanzas cu mester tin un bon monitor riba desaroyonan financiero cerca entidadnan di Gobierno, pa asina por reconoce y mitiga e riesgonan pa finanzas di Gobierno mas lihe posibel.
