Mayoria di e votadonan di partido di coalicion kier prohibi terapia di conversion gay

(nltimes.nl) – Mayoria di e votadonan Hulandes, incluyendo un mayoria di esnan cu a vota pa PVV, VVD, NSC, y BBB, kier prohibi terapia di conversion gay. Solamente 20% di Hulandesnan, mayoria di esnan cu a vota pa e partidonan Cristian conservativo, no ta considera cu esaki ta necesario, segun e encuesta anual di Pride di EenVandaag entre 23.050 di su panel di opinion.

Na november, tres di e cuatro partidonan di coalicion a rechasa firma un Acuerdo Arcoiris pa apoya derechonan LGBTQIA+. Solamente VVD a firma.

Terapia di conversion gay ta un forma no comproba di terapia pa suprimi orientacion sexual of identidad di genero di un persona. Contrario na diferente otro pais, e no ta ilegal na Hulanda. Parlamento anterior kier a haci esaki castigabel, pero segun e Conseho di Estado, e prohibicion ta contra e derecho fundamental pa libertad di religion.

E Tweede Kamer nobo, tambe ta apoya e prohibicion di terapia di conversion gay. Incluso un mayoria di e votadonan di PVV (60%), cu ta apoya otro leynan anti-LGBTQIA+, ta pensa cu e terapia aki mester wordo prohibi. Tambe ta asina pa 77% di e votantenan di NSC.

Esnan cu ta contra, 20%, ta mayoria di e partidonan Cristian conservativo SGP y ChristenUnie. “Si un persona ta scoge pa sigui e terapia aki, e mes mester por dicidi. Mescos cu nan mester por dicidi kico nan kier yama nan mes,” un votante di ChristenUnie a bisa EenVandaag.

Tin hopi menos apoyo pa otro proyecto di ley faborabel pa LGBTQIA+ cu ta pasando den parlamento actualmente. E proyecto di ley aki ta permiti hende di 16 aña bay ariba pa cambia nan genero riba nan cedula di identidad y paspoort sin necesidad di un rapport medico. Solamente 36% di e votadonan ta pensa cu esaki mester ta posibel na Hulanda, y 46% ta contra esaki. Esnan cu ta contra ta den mayoria di e partidonan Cristian, pero un mayoria di e votadonan di PVV y BB tambe ta contra e idea. Segun EenVandaag, nan no ta contra un otro identidad di genero, pero principalmente nan ta duda e edad na cual hende por haci e cambio.

Mita di e votadonan di PVV , 51%, ta apoya un ley cu a pasa na Hungria cu ta prohibi e “representacion y promocion” di diferente identidad di genero y orientacion sexual den hende bou di 18 aña. E ley ta trata bukinan cu ta presenta hende di e comunidad LGBTQIA+ mescos pornografia – nan no por wordo bendi cerca di scol- of iglesianan, y na otro lugar nan mester wordo bendi den saco di plastic cera. Un votado di PVV a bisa cu e ta contra e “woke nonsense” cu ta bin cu informacion tocante ta gay. “Muchanan tin biaha ta pasa den un fase caminda nan kier ta un mucha homber of un mucha muhe. Y esaki ta pasa regularmente,” e votador di PVV a bisa.

Italia ta implementando un ley e aña aki cu lo haci’e mas dificil pa parehanan di mesun sexo reconoce un yiu. E ley ta nifica cu hendenan cu no ta e mayornan biologico no lo por busca su yiu for di scol, hiba nan na vakantie, of aproba tratamento medico pa nan sin e consentimento skirbi di e mayor biologico. Pa haya e derecho aki, e mayornan no-biologico mester oficialmente adopta e yiu – un proceso cu ta tuma mas o menos 3 aña y ta costa hopi placa.

E mayoria di e votadonan Hulandes, 64%, ta contra e ley aki. Mescos cu otro leynan no-faborabel pa LGBTQIA+, e votadonan iskierdista ta mas contra. Di e partidonan di coalicion, e votadonan di PVV ta mas na fabor, 39%, pero tin un tiki mas cu ta contra, 43%.