Mayoria di e bestianan exotico no ta na abattoir mas

Aparentemente riba ordo di Ministerio Publico, mayoria di e bestianan exotico haya riba un boto diadomingo pasa, no ta keda mas na abattoir na Bacadera.

Bon Dia Aruba a compronde cu un persona cu autorisacion a bay cu e macaconan, oncelot y parhanan. E turtuganan y cachonan a keda. Ayera un rueda di prensa tabata planea di parti di Veterinaire Dienst. Pero nan a cancela esaki y e departamento ta indica cu no por divulga ningun informacion ainda te ora cu Directie Volksgezondheid tin tur e datonan oficial prepara.

Veterinaire Dienst si a confirma na Bon Dia Aruba cu 8 di e 11parha Tucan a fayece y no 9 manera cu a wordo anteriormente publica. Bon Dia Aruba a puntra den ki estado e otro bestianan ta mirando cu ya caba ta 8 parha a fayece, kico ta e chens cu mas bestia por muri? Pero riba e pregunta aki e departamento no por a contesta na momento aki.

Proces-verbaal no ta cla

Bon Dia Aruba no a logra comunica cu Douane Recherche, como cu nan tin e caso segun KPA y nan ta percura pa traha e proces-verbaal pa Ministerio Publico. Pa locual ta e parti di Ministerio Publico, nan ta informa cu e proces-verbaal no ta cla ainda y investigacion ta andando.

Departamento di Salud Publico ta bisa Bon Dia Aruba cu nan no kier divulga ningun informacion na e momentonan aki pasobra nan kier zorg pa nan tin tur e informacion corecto prome. E proceso aki ta mustra cu e ta bay tarda un par di dia mas pa conclui kico lo ta e futuro di e bestianan aki. Y tambe pa haya sa ken a  manda pa busca e bestianan exotico.