Un mayoria di Congreso Mericano a vota pa impeach (huicio politico) presidente Donald Trump pa un segundo biaha, apenas un siman despues cu el a curasha esnan leal na dje pa ‘bringa’ contra resultadonan di eleccion – un discurso cu a sigui cu un multitud di su siguidonan invadiendo e US Capitol. Congreso a vota riba un articulo di impeachment pa ‘incita insureccion’ cu ainda tabata na caminda awe tardi.
Durante e debate prome cu e voto, presidente di Congreso, Nancy Pelosi a pidi Republicano- y Democratanan pa ‘busca den nan alma’. Trump lo ta e prome presidente Mericano cu ta haya un impeachment dos biaha.
Pelosi a bisa cu Trump “mester bay. E ta un peliger cla y presente na e nacion cu nos tur ta stima.”
Un berdadero retiro no ta mustra probabel prome cu inauguracion dia 20 di januari di presidente electo, Joe Biden. Un vocero pa lider di mayoria den Senado Mitch McConnell a bisa cu e lider Republicano no lo bay di acuerdo pa trece e camara back inmediatamente, practicamente sigurando cu un huicio den Senado no por cuminsa te sikiera dia 19 di januari.
Sinembargo, McConnell no a descarta condena Trump den evento di un huicio. Den un carta na su coleganan Senador Republicano poco prome cu Congreso a cuminsa vota, el a bisa cu ainda e no a dicidi. “Mientras prensa ta full di speculacion, ami no a haci un decision final riba con mi ta bay vota y mi tin intencion di scucha e argumentonan legal ora presenta esakinan den Senado”, McConnell a skirbi.
Den Congreso, e momento pa accion no tin paro.
E proceduranan di impeachment a yega un siman despues cu un multitud pro-Trump a invadi e US Capitol, mandando legisladonan sconde y revelando e fragilidad di e historia di transferencianan pacifico di poder na e pais. E insureccion tambe a forsa un aceptacion entre e Republicanonan, cu a sostene Trump durante su presidencia y en gran parti a permiti e pa plama atakenan falso contra integridad di eleccion 2020.
Mientras e prome impeachment di Trump na 2019 no a haya ningun voto Republicano den Congreso, sikiera ocho Congresista Republicano a anuncia cu nan lo separa di e partido pa vota cu e Democratanan e biaha aki, bisando cu Trump a viola su promesa di protege y defende democracia Mericano. Entre nan tabata rep. Wyoming, Liz Cheney, e Republicano cu rango #3 den Senado, y yiu di ex-presidente Dick Cheney.
Mientras tanto, Trump a duna un declaracion nobo urgiendo pa ‘NO violencia, NO kibra ley y NO vandalismo di ningun sorto’. Pero repetidamente el a nenga di asumi responsabilidad pa e insureccion siman pasa.
Congresista Republicano Kevin McCarthy a bisa pa prome biaha cu Trump si ta carga responsabilidad, reconociendo den Congreso prome cu e voto cu Biden ta e proximo presidente, y cu gruponan liberal radical no tabata responsabel pa e insureccion. Pero McCarthy a bisa cu e ta opone impeachment, na luga di esey faboreciendo un ‘comision fact finding’ y censura.
Bao menasa di mas problema di intruso, seguridad tabata excepcionalmente halto na e Capitol, cu imagennan shockeante di tropanan di Guardia Nacional, perimetronan sigur rond di e compleho, y screening di detector di metal rekeri pa legisladonan drentando e sala di Congreso.
E asombroso collapse di e ultimo dianan di Trump como presidente, hunto cu advertencianan di mas violencia na caminda, ta laga e pais den un posicion dificil y no familiar prome cu Biden asumi su cargo.
Trump ta enfrenta e cargo unico di ‘incita insureccion’. A diferencia di aña pasa, Trump ta enfrenta impeachment como un lider debil, perdiendo su propio reeleccion como tambe e mayoria Republicano den Senado.
Congreso a purba prome di pusha vice-presidente Mike Pence y e gabinete pa interveni, pasando un resolucion diamars anochi pidiendo nan invoca e di 25 Amienda na e Constitucion pa kita Trump di su cargo. Pence a laga cla cu e no lo haci esey, bisando den un carta na Pelosi cu ‘ta ora pa uni nos pais mientras nos ta prepara pa inaugura presidente electo Joe Biden’.
Ta leu di cla si lo tin e dos tercio di voto den un Senado igualmente dividi, necesario pa condena Trump, maske sikiera dos Republicano a pidi pa e ‘bay lo mas pronto posibel’.
