Ekipo reportero di Bon Dia Aruba a sali riba caya pa haya e opinion di ciudadanonan mes pa loke ta trata habrimento di frontera, cu diabierna awor 10 di juli ta cuminsa yega e vuelonan for di Merca.

Gilbert Thiel, store manager di un mercado conoci, a expresa cu manera ta wak e situacion di Aruba ta depende hopi di turismo y sin esey e no por draai. “Nos mester di e turistanan di Merca pasobra nan ta esun cu ta sostene nos.” Tambe el a menciona cu tin hopi hende cu ta na cas y cu no tin trabou.

Pa Covid-19, el a señala cu esey no lo bay, “el a bin pa keda”. E solucion pa aworaki no tin’e y Aruba no por keda tampoco cu porta cera y man crusa, pa motibo cu pa fin di aña, mas di e mita di hende di Aruba lo ta na cas y tin cu wak. “Esey ta un reto”, Thiel a finalisa.

Carlos Lopez, doño di dos restaurant ubica den area hotelero, a splica cu habrimento di frontera ta algo cu Aruba mester pa motibo cu ta hopi importante pa haya turismo, cu ta e sosten di e economia. Nan como comerciantenan mester di nan entrada, te na momentonan aki nan tabata depende di hende local. “E local ta yuda hopi si, e ta un mercado importante. Pero e forsa di nos economia aki na Aruba ta turistanan, sin nan, nos no por sobrevivi hopi tempo.” Apertura di frontera tambe tin su riesgo, Lopez a declara, pero e ta consciente cu ta bay sigui tin problema cu coronavirus, pero cu e personanan mester cuida, tanto turista como hende local cu mester traha manera un ekipo, tanto gobierno como comerciante. Distanciamento tambe ta algo importante, pero segun e, “ta un tiki fastioso pasobra nos mester wak con nos ta bay haci’e. Pero tur hende mester pone su granito de arena” Lopez a comenta.

Elena Arends a expresa cu ta un situacion dificil si ta bisa si of no. “Pero bida ta sigui y economia tin cu draai y esunnan cu tin problema cu salud mester cuida.” Tocante e medidanan cu Gobierno a implementa, el a bisa cu ta corecto pa turistanan haci e pruebanan prome cu bin y cu e personanan mester tuma precaucion. “Mi no ta weita cu ta un problema si e pais tin su reglanan. Aruba ta un isla turistico y si nos bisa cu nos ta keda cera nos ta muri di hamber, pero cu salud.”

Di su parti, Mario Solognier a trece dilanti cu e ta un tiki preocupa pa motibo cu tin hopi brote, y ta espera cu Aruba lo ta hopi bon prepara pa e turistanan ora nan bin, ya cu “nos mester di nan.” Bida tin cu sigui igualmente cu economia aunke Merca ta representa un peliger pa motibo cu ta e pais cu tin mas casonan positivo di Covid-19 na nivel mundial, pero mester habri e frontera.Tocante e medidanan implementa, Solognier a menciona cu ta hopi bon pa turistanan haci prueba.