E cantidad di contagio di COVID-19 entre residentenan a surpasa esnan no residente. Asina vocero di DVG Jurette Croes a informa Bon Dia Aruba. “Ta considera un studiante Arubiano di vakantie na Aruba como un turista. Y si tuma nota di e cifranan tin mas residente cu turista. Dus no ta asina cu mayoria di esnan cu ta infecta awor ta studiante.”
DVG ta evaluando pasonan nobo, basa riba e casonan, pa asina delinea e miho strategia y si ta necesario pa bin cu medida si of no, Croes a splica Bon Dia Aruba.
“Esnan cu ta infecta ta mas tanto e grupo entre 19 pa 29 aña di edad,” Jurette Croes a ilustra.
A puntra Croes si ta considerando protocol special pa alumnonan escolar, mirando cu falta dos siman prome cu vakantie caba. “Nos ta vacunando hobennan di 12 aña bay ariba. Mas vacuna duna nos hobennan, miho proteha nan ta. Pues pa ora cu scol habri nos ta spera cu hopi mucha ta vacuna.”
Jurette Croes a bisa cu na e momento aki DVG ta vacunando mas o menos 200 persona pa dia, pues si sigui e ritmo, poco poco ta yega na e asina yama ‘herd immunity.’
Te cu Dialuna anochi, e unico persona cu COVID-19 den camber di cuido intensivo, ICU tabata un persona riba 60 aña. E otro personanan tur ta den e sala pa COVID-19, segun informacion cu a ricibi di Charlaine Huntington di dr. Hospital Horacio Oduber.
